Sinulog half-marathon mosikad karong Enero 17

CEBU – Maginukdanay na usab ang mga banggiitang karerista dinhi sa Sugbu sa ipahigayong Sinulog 21K half-marathon karong Enero 17, 2009, usa ka adlaw sa dili pa ang giatangan nga Sinulog grand parade.

Nagkanayon ang presidente sa Cebu Executive Runners Club (CERC) nga si Jess Taborada nga gibanabanang kapin sa usa ka libo ka mga karerista muhugop sa kadalanan karong tuiga.

Ang maong lumba nga nakadawat og dakong suporta gikan sa PATAFA niadtong miaging tuig, gibahin sa duha ka dibisyon nga mao ang 5K ug 21K event.

Dugang usab ni Taborada nga ang Mizuno ug Cathay Pacific mao gihapon ang main sponsor sa lumba ug alang sa mga gustong mamahimong sponsor sa maong event pwede kamong mo-contact ni Marlene Calo sa ASAP Advertising sa numero 09067953563.

Ang registration sa maong lumba magsugod sunod semana didto sa Sugangan Restaurant ug sa Philippine Sports Commission (PSC) nga nahimutang sa Cebu City Sports Complex, alang sa dugang kasayuran pwede kamong mo-text sa numero 09175251259. (Lemuel P. Maglinte) (BANAT NEWS)