Cavs ug Celtics Midaug

CEBU – Padayong mihipos ug kadaugan ang defending champion Boston Celtics ug ang Cleveland Cavaliers didto sa ilang balwarte samtang pabiling sab silang nagtungtong sa kinatas-an sa team standing sa ilang tagsa-tagsa ka division sa nagpayon nga aksiyon sa National Basketball Association.

Ang Celtics yano kaayong mikulata sa Washington Wizards sa iskor 108-83 aron pag-angkon ug 29-5 nga baraha ug paghupot sa liderato sa Atlantic Division sa Eastern Conference didto sa ilang korte sa TD Banknorth Garden sa Boston, Massachusetts samtang ang Cavaliers milampurnas sa Chicago Bulls sa iksor, 117-92 ug pabiling hapsay didto sa Quicken Loans Arena sa Cleveland, Ohio diin sila adunay 17-0 nga baraha ug maoy lider sa Eastern Conference Central Division sa ilang 27-5 nga baraha.

Diriyot maharus ni Paul Pierce ang iyang field goals kagahapon dihang nakahimo siya’g 9-10 field goals pinaagi sa pagpasulod sa tanang siyam niya ka tirada ug lima ka three-pointers sa third quarter apan sa kataposang 48 segundos, gipalingkod na siya ni coach Doc Rivers ug wala na pabalika. Ang Celtics naglabaw na’g daku diang milingkod si Pierce, 81-55 sa third quarter.

Si Pierce maoy nangu sa Celtics sa iyang 26 puntos samtang sila si Ray Allen ug Eddie House parehong may 14 puntos ug si Kevin Garnett may 10 puntos. Si Rajon Rondo mihimo’g 14 ka assists atol sa maong duwa lakip sab sa iyang 10 puntos.

Ang Celtics kinsa nakahim’g club record nga 19 ka sasungosn nga daug, nagsukarap sa ilang pagbiyahe didto sa West Conference dihang nahiagum sila’g 1-3 nga baraha human mapandol batok sa LA Lakers, 83-92, napilde sa Golden State Warriors, 89-99 ug gitiwasan sa Portland Trail Blazers, 86-91 ug ang bugtong daug mao ang duwa batok sa Sacramento Kings nga ilang gi-ihaw ug 45 puntos, 108-63.

Ang 27-2 nga baraha nga nakuha sa Celtics sa wala pa sila mosulong didto sa West sa adlaw sa Pasko, maoy labing maayo sulod sa 29 ka duwa sa kasaysayan sa NBA.

Sila si Nick Young ug Antawn Jamison may 15 ug 14 puntos alang sa Wizards kinsa mitiurok na ngadto sa 6-25 nga baraha nga maoy labing ubos sa tanang teams sa Eastern Conference.

Sa laing bahin, mihimo’g triple double si LeBron James aron pangulohan ang Cavaliers pinaagi sa iyang 16 puntos, 10 ka rebounds ug 11 ka assists.

Tulo ka laing Cavs ang nakahimo’g seashon-highs ug sulagma kaayo nga silang tulo pulos may 13 puntos. Sila mao si Ben Wallace, rookie JJ Hickson ug ang reserve nga si Sasha Pavlovic samtang si Delonte West mi-iskor ug 14 puntos ug si Mo williams may 10 puntos aron tabangan ang Cavs pagposte ug 27-5 nga baraha.

Ang Bulls kinsa naghupt karon ug 14-19 nga baraha, gipangulohan ni Ben Gordon kinsa mihipos ug 22 puntos.

Ang mas paboritong LA Lakers midaug sab kagahapon batok sa Utah Jazz, 113-100 apan ang Portland Trail Blazers nahagsa na sab didto sa ilang homecourt dihang napilde sila batok sa New Orleans Hornets, 77-92.

Sa laing duwa palibot sa NBA, midaug ang Toronto Raptors batok sa Houston Rockets, 94-73, midaug ang Orlando Magic batok sa Miami Heat, 86-76, naka-ipsot ang Indiana Pacers batok sa New York Knicks, 105-103, gipaak sa Minnesota Timberwolves ang Golden State Warriors, 115-108, gisumpo sa Denver Nuggets ang Oklahoma Thunder, 122-120, naligsan sa Detroit Pistons ang Sacramento Kings, 98-92, gipukan sa San Antonio Spurs ang Memphis Grizzlies, 91-80, gilubong sa Milwaukee Bucks ang Charlotte Bobcats, midaug ang Dallas Mavericks batok sa Philadelphia sixers, 96-96, midaug ang Phoenix Suns batok sa LA Clippers, 106-98 ug midaug ang New Jersey Nets batok sa Atlanta Hakws, 93-91 pinaagi sa overtime. – BANAT NEWS