CEBU – Plano karon sa Samahang Basketbol ng Pilipinas (SBP) ang pagbukas og usa ka training camp alang sa mga Fil-American nga basketbolista didto sa Estados Unidos karong Abril.
Si SBP executive director Noli Eala nagkanayon nga ang training camp posibeling itukod ngadto sa kasadpang bahin sa Estados Unidos. Usa usab ka tournament ang apilan sa national team ang ipahigayun atol sa maong training camp agi'g pagpangandam sa 2012 London Olympics.
Nag-una sa listahan sa mga Fil-American prospect nga imbitahan sa SBP alang sa maong training camp, naglakip sa duha ka 6-foot-9 nga sila si Gian Chiu ug Japeth Aguilar kinsa kasamtangang niduwa karon sa US NCAA.
Matud pa ni Eala nga gikuha nila karon ang serbisyo sa senior director for player personnel sa Toronto Raptors nga si Jim Kelly aron mamahimong chief scouting director didto sa US.
Matud pa usab ni Eala nga ang 25-player developmental team ubos sa giya ni Serbian coach Rajko Toroman mobalik sa ilang pagbansay-bansay karong Miyerkules sa dili pa sila molupad ngadto sa Serbia karong Marso ug dayun didto sa US.
Dugang pa ni Eala nga ang Western of Kentucky University player nga si Aguilar ug si Oberlin College starter nga si Chiu nipadayag na sa ilang interes sa pagsalmot sa national team aron mulampos kini sa FIBA-Asia Championship Cup karong Agosto. (Lemuel P. Maglinte) (BANAT NEWS)