Air21, Beermen mag-ilog sa katapusang luna sa quarterfinals

CEBU – Human nila gipalagpot ang tagsa-tagsa nila ka mga kaatbang sa first-round sa wildcard phase, magtiwas karon ang Air21 Express batok sa San Miguel Beerman sa do-or-die game nga gitakda sa alas-6 sa hapon didto sa Araneta Coliseum.

Ang duha ka koponan nga nakatagamtam og taas nga panahon nga bakasyon, sagubangon na karon sa Express ug Beermen ang usag-usa aron mahingpit ang quarterfinals match up diin ang mudaog kanila gitakdang muatubang sa Barangay Ginebra Kings.

Ang Express nga nilampos sa pagtaktak sa Purefoods Tender Juicy Giants niadtong Domingo naglaraw karon nga modaog ug moabante sa sunod round. Si Perasol kinsa nagmaya dili lang sa ilang kadaugan, apan lakip na usab ang pagkadungag nila ni Cyrus Baguio ug Celino Cruz gikan sa Red Bull Barakos ngadto sa laing line-up, nagkanayon nga wala sila malisang sa kadagko sa mga player sa Beermen.

Si Gary David kinsa mao ang nitimon sa Express sa katapusan nilang duwa sa iyang 20 puntos, giatangan karong mopakita sa iyang kaidlas aron gub-on ang depensa sa Beermen.

Sa ilang bahin, si coach Siot Tanquincen nanganti karon nga molampus sa ilang tahas sa paglangkat sa automatic quarterfinals berth. Si Tanquincen nagkanayon nga gikinahanglan nila nga modaog karon aron dili sila mauwawan sa ilang gidangatan nga pagkahagsa didto sa wildcard round, kahinumduman nga ang Beermen mao ang usa usa mga nag-unang team sa standing sa sayung bahin sa conference, apan nakahiagum kini og sunod-sunod nga kapildehan hinungdan sa pagkahagsa niini sa ikaunom nga dapit.

Ang Sugbuanong si Dondon Hontiveros ang usa sa mga gitahasan karon ni Tanquincen nga maoy mangulo sa opensa sa Beermen. Gidasig usab ni Tanquincen sila si Danny Seigle ug Lordy Tugade nga mobahug karong adlawa. – BANAT NEWS