Sogod Team kampiyon sa Red Durano Cup

CEBU - Nasakmit sa Sogod Team ang korona sa Red Durano Congressional Cup sa miaging adlaw pinaagi sa pagpukan sa host Danao City sa iskor, 89-77 didto sa Danao City Auditorium.

Sa sangka sa ikatulong pwesto, gilampaso sa Carmen ang team sa Poro sa iskor, 90-69.

Ang beterano ug kanhi commercial player nga si Roy Arnado maoy mitimon sa Sogod pinaluyohan sab ni Wilbert Sayson. Si Arnado mi-iskor og 24 puntos ug si Sayson nga kanhi sakop sa Cebuana Lhuillier-RP Team, mi-iskor og 23 puntos.

Hapit tanang players sa Sogod maayo kaayong nakaduwa ug gani ang pambato sa Southwestern University (SWU) Cobras nga si Alfred Belande igo lang mitampo og dos puntos apan midaug gihapon ang Sogod og 12 puntos.

Ang kauban ni Belande sa SWU nga si Eric Zanoria, maoy nanghawod alang sa Danao pinaagi sa iyang 22 puntos samtang sila si Micahel Luga ug Alano Caputolan mi-iskor sab og double figures——19 puntos kang Luga ug 12 puntos kang Caputolan.

Gipahigayon dayon ang awarding human sa duwa diin si Congressman Red Durano nga taga dakbayan sa Danao, mihatag sa mga tropeyo ngadto sa mga mananaug.

Puntos kada usa:

First Game: (for 3rd place)

Carmen (90)— Fajardo 15, Ruiz 14, Into 13, Manzo 12, Ramos 6, Buot 6, Bugtai 6, Pongautan 6, Factor 5, Perez 5, Malinao 4, Bonjoc 4, Into A. 2, Dorong 2

Poro (69)— Poligrates 27, D. Estrera 17, Olitres 13, R. Sevilleno 6, G. Sevilleno 4, J. Estrera 2

 Second Game:

 (championship)

Sogod (89)— Arnado 24, Sayson 23, Trangia 14, Mara 14, Laurel 12, Belande 2

Danao City (77)—Zanoria 22, Luga 19, Caputolan 12, Toledo 11, Paradiang 7, Calderon 7, Capoy 6, Basañes 3 (Gabby G. Malagar)   (BANAT NEWS)