CEBU - Imbitado si pound-for-pound king Manny “Pacman” Pacquiao sa pagbukas sa National Amateur Boxing Championship nga mosikad karong Enero 17-24 didto sa Bacolod City, Negros Occidental.
Matud pa sa umaabot ABAP secretary-general Parol Gregorio nga si Congressman Monico Puentevella kinsa milingkod niadtong miaging adlaw isip Philippine Olympic Committee chairman mi-imbitar na ni Pacman isip speaker sa walo ka adlaw nga kalihukan.
“The National Championship has no other than the world’s best fighter to inspire our boxers during the opening rites. His presence should be a big boost not only for the boxers but to Philippine boxing in general,” matud ni Gregorio.
Gidugang ni Gregorio nga ang maong tinuig nga torneyo magsilbing sinugdanan sa mas dako ug halapad nga liga sa boksing sa nasud.
“The championship promises to be more colorful and exciting with the boxing congress and the launch of the amateur boxing inter-region tournament similar to the concept of Liga Pilipinas,” dugang ni Gregorio.
Gipaabot usab nga mosalmot sa National Amateur Boxing Championship si Harry Tañamor kinsa bag-ohay palang mikampiyon ug didto sa Moscow, Russia sa gipahigayong World cup.
Alang sa dugang kasayuran puwede ninyong makontak si Art Aro sa numero 09189497789 ilabi na sa mga interesadong mosalmot ug gustong mahimong stakeholders sa torneyo. (Lemuel P. Maglinte) (BANAT NEWS)