Sacred Heart midaug batok Don Bosco sa fya

CEBU - Ang kanhi UV Lancer shoting guard nga si Jaymar Tacaldo ug si Britt Carlo Reroma nga coach sa San Beda Red Cubs sa NCAA, nagmangtas aron pagnulohan ang Sacred Heart Parents Association ngadto sa 95-90 nga kadaugan batok sa Tri J Marketing -Don Bosco aron paglansang sa ilang ikaduhang kadaugan sa nagpadayon nga 1st F. Llamas Youth Association (FYA) Friendship Cup sa miaging adlaw didto sa Vicente Sotto Memorial gym sa barangay Punta Princesa, ning dakbayan.

Sa sayo pa, ang Sherilyn Plastics naka-ipsot batok sa host FYA Selection, 88-84 aron pagtabla sa 1-1 nga baraha tali sa ilang biktima.

Si Tacaldo nag-igo og maayo sa gawas aron makahagdaw og 31 puntos samtang si Reroma, ang bag-ong coach sa San Beda juniors didto sa Manila, mihipos ug 30 puntos.

Nakahuygo ug maayo si Reroma tungod kay wala man moduwa ang laing taga UV nga si Jaysar Esperat ug nadugangan ang iyang trabaho isip point guard ngadto na sa usa ka scorer.

Si Cyril Mercado mitampo sab og double figures alang sa Sacred Heart parents pinaagi sa iyang 17 puntos apan wala kaayo makakuha’g daghan nga puntos sila si Alaric Nazareno, Benedict Chua ug ang SBP-Passarelle coach nga si Bon Rosito.

Si Jorey Perez maoy nangu sa Tri J Marketing-Don Bosco sa iya sab kaugalingon nga 17 puntos samtang ang kanhi USC-Warrior nga si Ryan Carlo Padayao mi-iskor og 15 puntos.

Sa laing bahin, si Beboy Potencioso kinsa usa ka beterano sa miaging torneyo sa Inter-City League ubos sa Cebu City Niños team, maoy nangu sa Sherilyn Plastics sa iyang 21 puntos samtang ang ex-UC Webmaster point guard nga si Kenneth Kern Sesante mitampo og 17 puntos.

Ang team manager sa Sherilyn Plastics nga si Richard Mercado mi-iskor og walo ka puntos.

Laing nakahimo’g double figures mao sila si Anton Colminares ug Elro Cañete kinsa may 14 ug 11 points alang sa Sherilyn Plastics.

Ang pilderong FYA squad gipangulohan ni Viking Rollon kinsa miburak og 32 puntos samtang si Derek Montero mihakot og 26 puntos. (Gabby G. Malagar)  (BANAT NEWS)