Cebu nidominar sa 2008 Governor Icot Petilla Invitational Road Race

CEBU - Sama sa gikaintapan, nanghawud na usab ang Team Cebu sa gipahigayung 2008 Governor Icot Petilla Invitational Road Race niadtong miaging adlaw didto sa Hilongos, Leyte.

Gitag-an na daan nga ang mga tag-Sugbu ang maglawig sa maong torneyo. Si Randy Carbonera sayun ra kaayong nilangkat sa kampiyonato sa 100-kilometer individual road race.

Samtang si Judmar Villarosa maoy nagsunod ni Carbonera alang sa ikaduhang dapit ug si Janno Canasa nga mipahiluna sa ikatulong dapit.

Sa 400-meter sprint, nigawas nga mananaug si Marjun Villarusa alang sa class A, kini mao ang ikaduhang award ni Villarusa human usab siya mugawas nga second placer sa laing category samtang si Carbonera nikuhit sa third place.

Usa ka semana sa wala pa ang pasko, ang grupo nila ni Carbonera ni-apil usab sa mountainbike competition didto gihapon sa Hilongos diin giharus nila ang tanang award sa nagkadaiyang event nga ilang gisalmotan.

Ang lumad nga taga- Inupacan, Leyte nga si Joy Navates maoy first placer sa class B sa sprint event, samtang si Efren Lasquete sa Hilongos nipwesto sa second place gisundan sa Sugbuanong si Walter Matudan.

Sa laing bahin, nilampos si Philip Sainz sa Ormoc sa pagkulit og duha ka daog human niya gipangulohan ang executive division ug 60-kilometer sa maong lumba.

Nagsunod ni Sainz ang iyang teammate nga si Edwin Relivo ug laing taga-Hilongos nga si Boyet Suarez nga milingkod sa ikaduha ug ikatulong dapit.

Gipilde usab ni Sainz sila si Ernie Gupo ug si Dr. Jaime Gatchalian alang sa Hilongos Cycling One event. (Lemuel P. Maglinte) (BANAT NEWS)