Fabio Salsa gisugba sa Yayoy's Grill

CEBU - Nalanay ang Fabio Salsa ’92 dihang gipukan sila sa Yayoy’s Grill and Resto Bar 2002 sa iskor nga 73-48 sa nagkainit nga aksiyon sa 2008 University of San Carlos Boys High Alumni Basketball Association (USCBHABA) Atan Guardo Barkadahan Cup niadtong miaging adlaw didto sa USC-North Campus gym.

Wala na hatagig higayon sa Yayoy’s Grill ni Cebu City councilor Raul D. Alcoseba ang Fabio Salsa nga makasukol dihang gipaulanan dayon nila kini sa ilang mga tira alang sa 18-10 nga iskor sa pagsugod sa duwa.

Gisundan dayon nila kini sa ilang 29-11 rally sa second period aron itukod ang 26 puntos nga labaw sa half-time, 47-21.

Gikan didto wala na lingia sa Yayoy’s Grill ang Fabio Salsa, aron hingpit nga masakmit ang daog.

Ang playing team manager nga si Rocky Alcoseba miposte og 20 puntos aron pangulohan ang Yayoy’s Grill, samtang si Abellanosa ug Ruiz mikumboya og 32 puntos.

Ang 2008 USCBHABA season gipangulohan sa businessman-sporttsman nga si Jonathan “Atan” Guardo, uban sa Uniherb Philippines nga tigama sa Arthro, Heartvit, Kidneycare, Diabet ug Eyeberry.

Puntos matag usa:

Yayoy’s Grill (73) – Alcoseba 20, Abellanosa 18, Ruiz 14, Move 6, Ferrer 5, Moran 4, Tan 2, Bolang 2, Ynclino 2.

Fabio Salsa (48) – Olvido 19, Inocencio 14, Alcover 8, Alo 3, Lava 2, De Leon 2,

Quarterscore: 18-10, 47-21, 61-36, 73-48. (Lemuel P. Maglinte)    (BANAT NEWS)