Coca Cola gitagak sa San Miguel

CEBU – Nahanaw na ang pangandoy sa Coca Cola Tigers nga moabante ngadto sa quarterfinals dihang gipapha sila sa San Miguel Beermen sa iskor nga 99-89, sa nagkainit nga wildcard round sa KFC-PBA Philippine Cup gahapon didto sa Araneta Coliseum.

Ang Tigers nitapos sa double-round elimination nga nagtangag og 7-11 win-loss nga baraha. Ang bag-o palang nahimong coach sa Tigers nga si Kenneth Duremdes nagkanayon nga luag sa ilang dughan ang pagdawat sa ilang kapakyasan sa mga kamot sa Beermen.

Ang Tigers igo lang nikulit og 29 % sa ilang field goal percentage sa first half nga maoy hinungdan sa 14 puntos nila nga biya, 38-52, paingun ngadto sa third quarter.

Sa laing bahin, ang Beermen nga wala damha nga masugamak sa wildcard round nipakita sa ilang kabangis sa maong duwa. Sukwahi sa 29% field goal percentage sa Tigers, ang Beermen nirehistro og 38% field goal sa first half. Ang duha ka gwardiya nga sila si Lordy Tugade ug Dondon Hontiveros nikumboya og 23 puntos aron pangulohan ang Beermen.

Nisuway pag-apas ang Tigers atol sa final period dihang mipatusak si Ricky Calimag sa iyang duha ka three-point shots aron inaug sa syete puntos ang labaw, 78-71 sa nahibiling nuybe minutos sa duwa apan dili kini igo aron mapaw'ng ang nagbagang opensa sa Beermen.

Si Hontiveros maoy top scorer sa Beermen sa iyang 24 puntos, gisundan nila ni Danny Seigle nga adunay 16 puntos ug Tugade nga mibahug og 15 puntos. Niamot usab og 14 puntos si Dorian Peña, samtang ang rookie nga si Bonbon Custodio nipuga og nuybe puntos.

Ang napildeng Tigers gipangulohan sa sentro nga si Asi Taulava nga miposte og 20 puntos ug milangkat og 14 ka rebounds. (Lemuel P. Maglinte) (BANAT NEWS)