Guiao mobiya sa Red Bull Barakos

CEBU – Human sa walo ka tuig niya isip head coach sa Red Bull Barakos ang banggiitang coach ug Pampanga Vice-Governor Yeng Guiao nipadayag sa iyang plano nga mobiya na sa Red Bull.

Atol sa interview sa media ni Guiao niadtong Biyernes, ang 49-anyos nga si Guiao ni-asuy nga panahon na nga buhian niya ang trabaho isip head coach sa Red Bull Barakos, nga maoy labing unang koponan nga natagak sa double-round elimination sa nagpadayong KFC-PBA Philippine Cup sa ilang 5-13 win-loss nga baraha.

Usa usab sa gihimong rasun ni Guiao sa iyang paghawa sa Red Bull mao ang pagkawagtang sa iyang mga sinaligang player kinsa gibalhin ngadto sa laing team. Kusog usab ang hugon-hugon nga ibaligya na ang Red Bull franchise, apan ang governor sa Red Bull nga si Tony Chua hugtanong nihimakak sa maong isyu.

Matud pa ni Guiao nga sa pagkakaron wala pa siya kahibalo sa sunod niyang lakang nga himoon, apan naghuwat gihapon siya sa desisyon sa management sa Red Bull mahitungod kaniya.

Sa laing bahin, laing duha sa mga dekalibreng magduduwa sa Red Bull ang gipaabot na usab karon nga mahitapon sa laing koponan. Sila si Cyrus Baguio ug point guard nga si Celino Cruz gitakdang birahon sa Air21 Express isip bag-ong miyembro sa ilang koponan.

Wala pa hinoun giklaro sa Express kung moduwa na ba ang duha karong adlawa sa wildcard round dihang sangkaon nila ang Purefoods Tender Juicy Giants sa main game sa alas-6:30 sa gabii.

Mokumpleto sa double-header karong adlawa mao ang Coca Cola Tigers nga makigbugno sa San Miguel Beermen sa pasiunang duwa nga gitakdang sugdan sa alas-4:00 sa hapon.

Gawas nila ni Baguio ug Cruz, ubay-ubay nang mga banggiitang player ang gibuhian sa Red Bull, kini naglangkub nila ni Mick Pennisi , Junthy Valenzuela, Topex Robinson, Paolo Bugia, Rich Alvarez, Kerby Raymundo, Willie Miller, Rico Villanueva, Lordy Tugade ug Larry Fonacier. – BANAT NEWS