CEBU - Sa ikaduhang higayon, ang lungsod sa Pilar sa Siargao island, Surigao del Norte mo-host na usab sa International Game Fishing Tournament unya sa Mayo 7-9 sa sunod tuig diin gikatakda nga mosalmot na sab pag-usab ang mga langyaw nga "anglers" ang tawag sa mga game fishers.
Dihang unang gihimo ang kumpetisyon sa miaging Abril 17-19, gibana-banang may 70 ka mga anglers ang misalmot sa nagkadaiyang mga kategoriya suma pananglit sa pagdakop Og Tanigue, Blue Marlin ug tuna diin ang mga anglers o mamasolay pagahukman sa kidak-on ug gibug-aton sa ilang kuha aron mailhan kung kinsa gyud ang mananaug.
Sa 70 ka misalmot kaniadtong Abril, 30 kanila ang mga langyaw ug 12 ang gikan sa Russia.
Si Congressman Francisco Matugas Sr. sa Siargao island kinsa maoy nagpasiugda ug nagpaluyo sa nahisgotang international nga kumpetisyon, personal nga mibisita didto sa Russia aron lang pag-imbitar sa mga Rusong game fishers.
Ang angling usa lang sa duha ka international events diha sa Siargao island nga kanunay gihugpoan og mga turista mga langyaw man o dili ug ang ikaduha mao ang windsurfing.
Matod pa ni Matugas nga daghang Sugboanong anglers ang misalmot atol sa kumpetisyon kaniadtong Abril nga gitambongan gyud mismo ni Presidente Gloria Macapagal-Arroyo isip pinasidunggang dinapit. (BANAT NEWS)