Lakers Midaug Sa Memphis

CEBU - Gibaswat ni Kobe Bryant ang Los Angeles Lakers aron malikayan ang ikatulo unta nilang kapildehan sa ilang road trip dihang mihipos siya’g 10 sa iyang 36 puntos sa fourth quarter aron pagpukan sa Memphis Grizzlies, 105- sa FedEx Forum sa Memphis, Tennessee.

Sa maong duwa, mibalik usab didto sa Memphis si Pau Gasol nga kanhi usa ka sakop sa Grizzlies ug maoy naghupot og record sa 12 ka statistical categories alang sa iyang kanhi team lakip niini ang points, rebounds ug blocks.

Apan dili tanan ang nalipay sa pagbalik ni Gasol sa Memphis tungod kay iyang nadawat ang managlahing reaksiyon sama sa makabungog nga pakpak ug hugyaw apan ang uban hait kaayong tingog nga "boo" niadtong wala makauyon sa iyang pagbiya sa Memphis.

Usa sa wala mo-boo kaniya mao ang iyang manghod nga si Marc Gasol kinsa igo lang naka-iskor og walo ka puntos alang sa Grizzlies.

"We know that to do. For a young team, they are still kind of searching for what that identity is going to be," matod pa ni Kobe nga maoy nakasalbar aron malikayan sa Lakers ang ilang ikatulong pagkahagba sa Eastern Conference road trip.

Ang Lakers aduna na karo’y 22-5 nga baraha ug mas lig-on ang ilang ikaparang ugma tungod kay mi-asdang sila ngadto sa balwarte sa New Orleans Hornets nilang Chris Paul ug David West.

Maanindot sab nga regalo sa Pasko ang naghuwat sa mga fans sa NBA tungod kay mopauli ang Lakers ngadto sa Staples Center sa Disyembre 25 aron pag-host sa defending champion Boston Celtics kinsa mikulata nila sa Game 6 sa NBA Finals kaniadtong Hunyo 17 sa iskor 131-92 nga nahimong ikaduhang labing daku nga biya sa kasaysayan sa NBA sunod sa 42 puntos nga biya sa Utah batok sa Chicago Bulls, 54-96 sa miaging Hunyo, 1998.

Gitimonan ni Bryant ang Lakers sa ilang 17-3 nga rally aron sakmiton ang labaw human sila mabiyai og lima ka puntos, 88-93 sa kataposang 3:08 sa duwa.

Sila si Gasol, Andrew Bynum ug Derek Fisher mipuntos sab og double figures alang sa Lakers samtang si Rudy Gay maoy nangu sa Memphis pinaagi sa iyang 23 puntos ug si OJ Mayo may 22 puntos.

Matod pa ni Gasol, "Somebody has to lose tonight, right? I’m happy we came out victorious because we need this win extremely bad to continue to pursue our goals. But I’m sorry that on the losing end were the Grizzlies and my brother."

Sa laing bahin, samtang nagbagat ang managso-ong Gasol didto sa Memphis, nagbagat sab ang managhigalang Chinese NBA players nga sila si Yao Ming sa Houston Rockets ug si Yi Jianlian sa New Jersey Nets diin midaug ang Rockets pinaagi sa 24 puntos ug 16 ka rebounds ni Yao ug si Yi mi-iskor lang og 10 ka puntos ug pito ka rebounds alang sa Nets didto sa ilang korte sa IZOD Center sa East Rutherford, New Jersey.

Ang Orlando Magic midaug batok sa Golden State Warriors, 113-81, gikulata sa San Antonio Spurs ang Sacramento Kings, 101-85 ug gilampurnas sa Denver Nuggets ang Portland Trail Blazers, 97-89 bisan og wala ang ilang leading scorer nga si Carmelo Anthony. – BANAT NEWS