Smart RP 5 kampiyon sa China Invitational Tournament

CEBU – Nipakita sa ilang katakus ang Fil-American nga si Joey Deas ug Far Eastern University (FEU) Tamaraw guard Mark Barocca aron pangulohan ang Smart Pilipinas National Team dihang ilang gilumpag ang higanteng Chinese team, 76-72 aron paglangkat sa kampiyonato sa labing unang China-Asean CBO Men’s Invitational Tournament niadtong miaging adlaw didto sa Pinggou Arena sa Guangxi, China.

Ang 5-foot-10 nga gwardiya nga si Deas kinsa adunay kaliwat nga taga-Sugbu ug ang taga-Zamboanga nga si Barocca nikumboya og 37 puntos.

Ang duha nihimo sa mga krusyal nga tira batok sa mas tag-as nga mga Tsino kinsa naglabaw og 15 puntos sa sayong bahin sa duwa.

Ang Chinese players nga nagbaton og average height nga 6-foot-6, nanghawod sa rebound batok sa mga Pinoy, 44-33, apan bisan pa man sa kakuwang sa height ang mga Pinoy nilampos gihapon sa pagpahamtang sa ilang hugot nga depensa nga miresulta sa 12 ka turnovers sa China.

Inubanan sa hugot nga depensa, ang RP Team nipasulod usab og 15 sa 21 niini ka mga tira. Ang Serbian Coach sa Philippine National Team nga si Rajko Toroman nagmaya human sa maong kalampusan.

“It was tough but definitely sweet victory. I challenged the boys to show their true character and they did. We did not expect to win right away so this is very good start for our program,” matud pa ni Toroman.

Human sa ilang kalampusan, ang RP 5 nangandam karon alang sa 209 SEA Games didto sa Laos, 2010 Asian Games didto sa China ug 2011 Fiba Asia Men’s Championship qualifier alang sa Loncon Olympics. – BANAT NEWS