Kama ni Yao Ming ibaligya

CEBU - Ang Beijing, China nga maoy host sa 2008 Olympics naglaraw karon sa pagbaligya sa mga mahinungdanong mga butang nga mokabat ug 20 milyones ka piraso nga nagamit didto sa Beijing Olympics lakip niini ang kama nga gihigdaan sa Chinese basketball star nga si Yao Ming samtang misalmot siya sa Oylmpics, kini matod pa sa ilang Beijing Times sa ilang balita kaniadtong Miyerkoles.

Lakip sa mga butang nga ipamaligya mao ang electric appliances nga gigamit ni Liu Xiang, ang ilang celebrity 110m hurdler nga napugos ug undang tungod sa na-angkon nga piang ug ang karaan nga musical instruments nga gigamit atol sa opening ceremony.

Tungod sa kadaghan sa mga butang nga nahibilin, gibana-bana nga maabtan pa’g duha ka tuig ang pagbaligya niini.

Ang pagbaligya pagadumala-on sa China Biejing Equity Exchange kinsa may katungod sa pagbaligya sa mga state-owned nga butang ngadto sa mga pribadong mamalitay.

Wala hinuon ibutyag sa Bejing Times kung pila gyud tanan ang halinon sa tanang butang apan kini ilang gibana-bana nga mokabat ug kapin sa usa ka bilyon nga Yuan o nagkantidad ug (US$145 million). (BANAT NEWS)