Suns misawop sa Portland

Cebu - Nagdahunog nga career-high 52 puntos ang girakrak ni Brandon Roy aron pangulohan ang Portland Trail Blazers ngadto sa 124-119 nga come-from-behind nga kadaugan batok sa Phoenix Suns kagahapon sa nagkainit nga aksiyon sa National Basketball Association (NBA) didto sa Rose Garden sa Portland, Oregon.

Si Roy kinsa nangandoy nga mahimong MVP sa All-Star Game, mihimo sab og career-high nga 19 ka free throws sa iya sab nga career-high 21 ka attempts sa free throw line. Ang iyang kanhing pinakadakung nahimo 38 puntos dihang napilde sila sa Los Angeles Clippers sa miaging semana.

Ang iyang tirada nga three-pointer maoy nakahatag sa Trail Blazers og labaw sa kataposang 1:01 sa fourth quarter ug mao na kadto’y nagsilbing yawe sa ilang come-from-behind nga kadaugan.

“I think this is by far the best offensive game I’ve had. I can’t say the basket was big, but my confidence was huge tonight. I just felt like every shot I took was going to go in,” matod pa ni Roy.

Ang kadaugan sa Trail Blazers maoy nagbugto sa ilang sagunson nga 11 ka pilde batok sa Suns. Ang 52 puntos ni Roy maoy ikalima nga 50-point game sa 38 ka tuig nga kasaysayan sa Portland franchise.

Ang franchise record sa Portland 54 puntos nga nahimo ni Damon Stoudamire kaniadtong Hunyo 14, 2005 batok sa New Orleans Hornets.

Si Steve Blake mitabla sab sa iyang season-high nga 22 puntos samtang mitampo si LaMarcus Aldridge og 16 puntos.

Si Amare Stoudemire maoy nangu sa Suns pinaagi sa iyang 23 puntos ug duha lang ka rebounds ug assists ang kuwang nga makahimo na sab siya’g triple double tungod kay nakahimo man siya’g walo ka rebounds ug walo ka assists.

Si Matt Barnes mitampo og 22 puntos alang sa Suns samtang sila si Shaquille O’Neal ug Steve Nash may 19 ug 15 puntos mata’g usa.

Sa laing duwa sa NBA kagahapon, gipukan sa Orlando Magic ang San Antonio Spurs sa iskor, 90-78 atol sa pagbalik sa ilang superman nga si Dwight Howard kinsa mipuntos og 14 didto sa ialng korte sa Amway Arena sa Orlando, Florida.

Si Jameer Nelson maoy nangu sa Magic sa iyang 24 puntos samtang si Rashard Lewis may 15 puntos ug si Hedo Tugkoglu may 11 puntos.

Napugngan sa Magic si Tony Parker nga igo lang naka-iskor og siyam ka puntos samtang may 10 puntos mata’g usa sila si Manu Ginobili ug Roger Mason apan ang nangu sa ilang opensa mao si Tim Duncan kinsang 19 puntos ug siyam ka rebounds wala sab makaluwas sa Spurs. - Gabby G. Malagar (BANAT NEWS)