Amancia ug O-Com milampos

Cebu - Gibaraw dayon sa Amancia Brokerage ang mas inilang Assessment Division pinaagi sa pag-iskor og 80-78 nga kadaugan kaniadtong Lunes sa gabii samtang ang mas kusog nga MJDL Brokers milampaso sa SUGBO Brokers, 108-96 sa 35 years old below category sa nagpadayon nga 14th District Collector’s Cup didto sa Vicente Sotto Memorial gym sa barangay Punta Princesa, ning dakbayan.

Sa bugtong sangka sa 35 years old above division, gipukan sa Office of the Commissioner (O-COM) ang MJDL sa iskor, 82-70.

Nag-una ang Assessment ni coach Rady Abarintos ug may 10 puntos nga labaw sa third period, 68-58 apan ang Amancia ni coach ug team owner Filmor Amancia mihinay-hinay og kamang sa unahan human magsige og sikit sa milabay’ng duha ka kwarter.

Nakahigayon gyud pagsakmit sa labaw ang Amancia ug ang kagumkom nga three-point shot ni Marvin Tundag maoy nagselyado sa ilang kadaugan ug mihatag og upat ka puntos nga labaw, 80-76.

Misikit na sab og balik ang Assessment sa iskor, 78-80 ug gani may higayon pa unta silang modaug apan naabtan sa huni sa buzzer si Randy Francia dihang iya na untang ipasa ang bola ngadto ni Daniel Enriquez nga naghuwat na didto sa three-point area.

Ang Assessment naghupot na karon og 1-1 nga baraha human sa ilang upset batok sa Pimentel Brokers sa miaging semana ubos ni coach Larry Villanil.

Si Freddie Ninel maoy nangu sa Amancia pinaagi sa iyang 23 puntos samtang si Geppy Giducos midugang og 15 puntos.

Ang Assessment gipangulohan ni Adrian Laborte kinsa mi-iskor og 19 puntos ug si Dondon Cadungog may 18 puntos. Wala kahuygo og maayo sila si Inting Bacalla ug team owner Mike Jude Logarta atol sa maong duwa.

Sa sayo pa, si Winhel Daan miburak og 33 puntos aron pangulohan ang O-COM samtang sila si James Jordan ug Noel Medalle maoy nangu sa kampanya sa MJDL pinaagi sa ilang 19 ug 15 puntos ug laing 14 puntos gikan sa beteranong si Roland Nacario.

Puntos kada usa:

First Game: (35 years above)

O-COM (82)—Daan 33, Davila 11, Herbito 10, Dela Peña 7, Solante 6, Nievera 5, Tumakay 4, Nadal 4, Resma 2

MJDL (70)— Jordan 19, Medalle 15, Nacario 14, Bacalla 7, Labayan 4, Tuico 4, Badon 2, Aleuda 2, Logarta 2, Baillo 1

Second Game:

Amancia (80)—Ninel 23, Giducos 15, Cane 14, Donere 12, Tundag 10, Miscala 4, Holorfida 2

Assessment (78)—Laborte 19, Cadungog 18, Rollon 13, Enriquez 8, Francia 8, Pianyar 4, Cañete 3, Trinidad 3, Cal 2. - Gabby G. Malagar (BANAT NEWS)