Maglasang niluwas sa Team Cebu

Cebu - Gibingwit ni Joey Maglasang ang usa ka bulawang medalya aron luwason ang Team Cebu City sa swimming event sa 3rd Philippine Olympic Festival kagahapon didto sa Cagayan De Oro City.

Si Maglasang kinsa ubos sa giya ni Rolando Alvarez, maoy nanghawod sa 50 meter breastroke event. Lakip sa mga medalya ni Maglasang, ang duha ka silver alang sa 50m ug 100m butterfly ug usa ka bronze medal alang sa 100m freestyle.

Sa laing bahin, gilabni usab ni Linn Navarro ang usa ka silver medal alang sa 10-under class sa 400m freestyle, samtang si Danielle Mae Ballesteros nibulsa sa iyang ikaduhang bronze medal sa POF classification.

Laing bronze medal ang nakuha sa Team Cebu City alang sa 4x50m mixed freestyle relay.

Sa pagsuwat niining balita, ang Team Cebu City aduna nay duha ka gold, upat ka silver ug lima ka bronze medals sa POF event. - Lemuel P. Maglinte (BANAT NEWS)