21-2 sa Boston franchise record

Cebu - Mirehistro ug usa ka franchise record ang Boston Celtics kagahapon human sa ilang 122-88 nga kadaugan batok sa host nga Washington Wizards sa nagpadayong aksiyon sa National Basketball Association (NBA) didto sa Verizon Center sa Washington, DC.Sa ilang 21-2 nga baraha sa kasamtangan, milanat na sab sa sagunson nga 13 ka daug ang Celtics ug usa na lang ka daug matablahan nilang ang pinakataas nga winning streak sa ilang franchise nga 14 ka daug.

Bisan sa pinahaon nilang Bill Russell, Larry Bird ug Bob Cousy sa naglabay’ng henersayon, dili ingon ana kamaayo ang Celtics nga naka-angkon ug 21-2 nga winning run. Sa miaging tuig, nakahimo sila’g 20-2 apan napilde sila sa ilang ika-23 nga duwa.

“I’ve been a big fan of history,” matod pa ni Kevin Garnett kinsa diriyot makakulit ug triple double sa iyang 11 puntos, 12 ka rebounds ug pito ka assists. “To establish ousrselves in the history that’s so enriched with culture and prestige and traidtion is a great thing,” padayon pa ni Garnett, ang usa sa bag-ong Big Three sa Celtics uban ni Paul Pierce ug Ray Allen.

Si Pierce ug Allen parehong mi-iskor ug 22 puntos aron pangulohan ang opensa sa Celtics ug sila si Kendrick Perkins ug Rajon Rondo may 12 ug 11 puntos.

Ang lima gyud ka starters sa Celtics pulos mi-iskor ug double figures ug lakip and duha gikan sa bench nga sila si Eddie House kinsa may 14 puntos ug Tony Allen nga may 10 puntos hinungdan nga midaug ang Celtics ug 34 puntos, ang labing daku karon nga season.

Ang Wizards nga mitidlum na ngadto sa 4-16 nga baraha, gipangulohan ni Caron Butler kinsa mihakot ug 19 puntos samtang sila si Juan Dixon ug Antawn Jamison parehong mipusa ug 17 puntos. Si DeShawn Stevenson lang ang starter sa Wizards nga wala gyud makapuntos kagahapon.

Sa laing duwa, gipaneguro sa Utah Jazz nga dili na makahimo’g laing milagro sa ilang road game ang Portland Trail Blazers pinaagi sa pag-iskor ug 97-88 nga kadaugan didto sa Delta Center sa Salt Lake City, Utah.

Si Mehmet Okur miburak ug 27 puntos ug milangkat ug 10 ka rebounds alang sa Jazz samtang si Brandon Roy may 33 puntos alang sa Blazers.

Midaug sab ang Dallas Mavericks batok sa Charlotte Bobcats, 95-90 ubos sa pagtimon ni Dirk Nowitzki kinsa mibugha ug 23 puntos ug mihakot ug 13 ka rebounds samtang si Emeka Okafor may 27 pujtos ug 17 ka rebounds along as Bobcats. - Gabby G. Malagar (BANAT NEWS)