Melo mibaswat sa Nuggets

CEBU - Gibaswat ni Carmelo Anthony ang Denver Nuggets ngadto sa 116-106 nga kadaugan batok sa Minnesota Timberwolves pinaagi sa pagtabla sa 33 puntos nga record sa third period ni George “Iceman” Gervin atol sa nagpadayong aksiyon sa National Basketball Association (NBA) didto sa Pepsi Center sa Denver, Colorado.

Si Anthony mi-iskor sab og season-high 45 puntos lakip sa iyang 11 ka rebounds ug tulo ka assists.

Nalabwan sab ni Anthony ang kanhi 32 puntos nga franchise record sa Nuggets nga nahimo ni David Thompson kaniadtong Abril 9, 1978 batok sa Detroit Piston.

Si Gervin mikulit og record nga 33 puntos sa second period alang sa San Antonio Spurs sa ilang duwa batok sa New Orleans sa mao gihapong petsa nga Abril 9, 1978.

“I’ve never been a part of a quarter like that before. I just felt that good. I can’t explain it. My 3-ball was going in, dribbling to the basket, getting fouled. Just the complete game tonight,” matod pa ni Anthony.

Si Chauncey Billups kinsa mi-iskor og 24 puntos alang sa Nuggets, mitug-an nga gusto niyang maka-iskor og 50 si Anthony kagahapon.

Ang Nuggets aduna na karo’y 15-7 nga baraha ug layo kung itandi sa Timberwolves nga nagbaton karon og 4-17 nga baraha.

Sa laing duwa, midaug ang Los Angeles Lakers batok sa Phoenix Suns, 115-110 ug nakasagunson sab dayon ang Spurs human sila maka-iskor og 95-89 nga kadaugan batok sa Atlanta Hawks.

Ang Cleveland padayong nagmangtas aron maka-iskor og sagunson nga napulo ka daug human ilang gipukan ang Philadelphia Sixers, 101-93 ug si Lebron James mi-iskor og 29 puntos.

Naka 2-0 sab sa labing unang higayon karon nga season ang Memphis Grizzlies dihang ilang gipukan ang Oklahoma Thunder, 108-102, midaug ang New York Knicks batok sa silingan nga New Jersey Nets, 121-109 ug gilatos sa Toronto Raptors ang Indiana Pacers, 101-88.

Sa laing kalamboan, gipadala sa Phoenix Suns sila si Raja Bell ug Boris Diaw ngadto sa Charlotte Bobcats puli kang Jason Richardson, ang leading scorer sa Bobcats. - Gabby G. Malagar (BANAT NEWS)