P3.5 bilyon kita sa Pacquiao-De la Hoya PPV

CEBU - Mahagtik nga US$70 milyones kon P3.5 bilyon ang halin sa HBO Pay-Per-View sa away nilang Manny Pacquiao ug Oscar de la Hoya niadtong Domingo didto sa MGM Grand sa Las Vegas, Nevada.

Kini nagagikan sa 1.25 ka milyon nga pay-per-view buys nga nakuha sa HBO sa maong away. Mao lamang kadto ang ikaupat nga higayon sa kasaysayan sa boksing nga ang usa ka non-heavyweight bout sa Amerika mi-abot og usa ka milyon ug apil si De la Hoya niining tanan.

Matud sa mga kadagkuan sa HBO nga mao sab kadto ang labing malampuson nga pay-per-view event karong tuiga.

Gani puwerting punoa sa MGM Grand Garden ug gibana-bana nga ang nanan-aw sa maong binyu milapas sa kapasidad niining 15,000 ka tawo.

Si pound-for-pound king Pacquiao (48-3-2, 36KOs) mikatkat og duha ka ang-ang sa timbang aron sangkaon si De la Hoya ubos sa welterweight division.

Si Pacquiao biya kaayo sa maong away apan gipakuratan na sab niini ang kalibutan sa boksing human yano ra niyang gikastigo si De la Hoya hangtud nga kini misurender sa wala pa magsugod ang ikasiyam nga hugna.

Bun-og kaayo si De la Hoya ug hapit mikipot ang wala niining mata gumikan sa paghubag. Mao kadto ang labing unang higayon sa iyang career nga kulatado si De la Hoya.

Gawas sa bahin niini sa halin sa pay-per-view, si Pacquiao mibulsa og US$6 million sa maong away, samtang si De la Hoya mitukob og US$20 million.

Si Pacquiao molarga karong adlawa sa dakbayan sa General Santos diin laing engrande nga selebrasyon ang gihikay alang kaniya. Didto sab magselebrar sa iyang birthday si Pacman, nga mag-30 anyos na karong Disyembre 17.

Sa petsa 19, si Pacquiao mobalik sa Amerika uban sa tibuok niyang pamilya aron didto mag-Pasko sa Los Angeles uban sa iyang kapikas nga si Jinkee, nga gikatakda manganak sa ikaupat nilang binhi sa dili pa matapos ang tuig. - Emmanuel B. Villaruel (BANAT NEWS)