Maraon, Gonzales mo-away karon sa California

CEBU - Human sa kadaugan ni Pound-for Pound king Manny “Pacman” Paquiao batok ni Oscar de la Hoya niadtong Domingo sa Las Vegas, lain na usab nga Pinoy ang makigbugno didto sa Estados Unidos aron mohakot og dungog sa Pilipinas.

Kini mao ang mga bag-ong sulbong nga boksidor sa Mindanao nga sila si Philippine bantamweight prospect Jundy “Pretty Boy” Maraon og featherweight Glenn “Rapid Fire” Gonzales isip undercard sa Urbano Antillion-Juan Ramon Cruz super featherweight encounter didto sa Maywood, California.

Apan matud pa ni Jeng Gacal nga maoy naghikay sa away nga wala pa hinganli hangtod ning pagsulat kun si kinsa ang makasangka sa duha ka Pinoy apan iyang gipasalig nga mo-away gyud kini didto sa America.

Mao kini ang pinakaunang away ni Maraon sa yuta sa America sukad sa iyang pag-abot niadtong Abril samtang ikaduha kini nga higayon ni Gonzales nga mopakita sa iyang katakos human usab kini midaog niadtong miaging Hulyo 5 batok ni American Robert da Luz didto sa Planet Hollywood, Las Vegas.

Laing mopakita og aksiyon si kanhi world junior flyweight champ Brian Veloria kinsa makigkarambula ni Mexican Benjamin Garcia.

Nahimutang karon si Maraon sa ikapitong luna sa ranking sa Philippine bantamweight ug lumad nga taga Suminot, Zamboanga del Sur kinsa gihugon-hugon nga posibling mokutlo og world title sama ni Manny Pacquiao.

Ang walhon nga si Maraon may gitas-on nga 5’6” ug nagtangag sa rekord nga 10 ka daug, walo ka knockouts ug usa ka draw samtang si Gonzales may gitas-on nga 5’7” ug naghipos sa rekord nga 7W-0L-1D, 4 KO’s.  - Arnie P. Atuel (BANAT NEWS)