CEBU - Migikan na niadtong miaging adlaw ang mga pambato sa Team Cebu City (TCC) alang sa 3rd Philippine Olympic Festival National Championships nga gikatakda karong Disyembre 11-16 didto sa Cagayan de Oro City.
Ang TCC gilangkuban og 66 ka atleta ug 15 officials ug coaches nga gipangulohan ni Cebu City Councilor Sylvan ‘Jack’ Jakosalem isip head sa delegasyon.
Ang TCC moduwa og lima ka sports events -- football, swimming, taekwondo, judo ug karatedo.
Ang TCC swimming squad sagad gilangkuban sa mga sakop sa Cebu Blue Marlins ug sila mao si Trina ug Noel Cañeda ug Paula Abigail sa University of Cebu, Anthony Linn ug Lyh Ann Navarro sa Cebu Eastern College, Michael Ichiro Kong sa FBC Christian School, Danielle Mae Ballesteros sa University of Southern Philippines Foundation, SES’ Beth Mae Arellano, Robin Jakobsen sa Don Bosco, Danielle Angela ug Serge Biscocho sa Maria Montessori International School, Kaitlin Danielle Capacio sa St. Theresa’s College ug Pierre Niño Baguio sa St. Francis of Assisi School.
Ang morepresentar sa judo mao sila si Joaquin Fernandez, Allan Antigua ug Alford Marimon, samtang ang TCC gikatakdang modepensa sa ilang 14-under title sa football event. - Yoyo R. Abayan (BANAT NEWS)