Yellow ug Maroon daug sa PTCA

CEBU - Nagmangtas sila si Bong Loquias, Neil Resma ug ang kanhi SWU Cobra Iron Man nga si Cesar Ortega aron pangulohan ang kampanya sa Yellow Team human ilang gilat-an ang Red Team sa iskor, 92-73 atol sa nagpadayon nga 8th USC-south Campus PTCA,Inc. basketball tournament didto sa South Campus sa covered court sa may dalan J. Alcantara ning dakbayan.

Sa laing duwa, gipukan sa Maroon team ang Blue team sa iskor, 88-78.

Wala kapugngi si Ortega sa third period diin gidominar sa Yellow ang duwa pinaagi sa ilang 41-17 scoring hinungdan wala gyud makahigayon og sikit ang Red nga gipangulohan ni kanhi-USJR power forward Rey Abarquez.

Bisa’g wala makasulod sa second period tungod sa barangayan format, naka-iskor gihapon si Ortega og 20 puntos kay wala’y nakapiog kaniya sa ilawom ug nagkapuliki siya’g pamuntos sa undergoal ug si Loquias mibirada og 21 puntos. Ang Yellow team igo lang nakahimo og pito ka puntos sa kinatibuk-ang second period apan bisan pa niana, nakalabaw gihapon sila’g 19 puntos, 51-32 ug dayon wala na manumbaling sa third quarter.

Ang presidente sa PTCA executive board nga si Dr. Hermes Ibon mitampo og kuwatro puntos samtang ang usa sa organizer nga si Rey Macias mi-iskor og dos puntos alang sa Yellow.

Misalga sab sa mainitong opensa si Neil Resma ug mihakot siya’g 20 puntos aron abagan sila si Loquias ug Ortega.

Si Abarquez maoy nangu sa Red sa iyang 26 puntos apan kuwang siya’g suporta sa iyang mga teammates sa ilang opensa.

Sa ikaduhang duwa, gipangulohan ni ex-pro ug kanhi USC Warrior Lou Regidor sa Maroon pinaagi sa iyang 26 puntos samtang si Jess Gabatan, ang auditor sa PTCA board, maoy nangu sa Blue sa iyang 22 puntos. Si Engr. Rick Fornis kinsa kanhi PTA officer, mi-iskor og 16 puntos.

Puntos kada usa:

First Game:

Yellow (92)—Loquias 21, Ortega 20, Resma, Flores 15, Alforque 10, Ando 9, Ibon 4, Macias 2

Red (73)— Abarquez 26, Aguilos 12, Igpit 12, Carampil 11, Daan 8, Cabajar 2

Second Game:

Maroon (88)— Regidor 26, Asignar 22, Quijano 19, Lopez 9, Lera 4

Blue (78)—Gabatan 22, Fornis 16, Mijares 16, Ebarle 12, Salaritan 9. - Gabby G. Malagar (BANAT NEWS)