CIIB 3-0 na sa LAYA

CEBU - Mikulit sa ilang sagunson nga kadaugan ang Criminal Intelligence and Investigation Branch (CIIB) human sila maka-ipsot batok sa Gold Team sa iskor, 73-71 kaniadtong Martes sa gabii atol sa nagpadayon nga torneyo sa Labangon Youth Association (LAYA) 1st Ritchie Osmeña Cup didto sa Labangon Sports Complex.

Sa laing sangka, naka-ispot sab ang MLS quintet human sab sila modaug og dos puntos batok sa Yellow Team sa iskor, 71-69.

Si Joseph Bugtai usa sa bayani sa CIIB tungod kay siya maoy nangu sa opensa sa iyang 20 puntos aron baswaton ang iyang team nga naghupot na karon og 3-0 nga baraha.

Si Viking Rollon og si Bryan Antiporda parehong mi-iskor ug 13 puntos alang sa Gold Team kinsa mitidlum na ngadto sa 0-3 nga baraha ug sila na lang ang wala pa makatilaw og daug sulod sa walo ka teams nga misalmot.

Sa laing bahin, si Nelson Luague ug si Mark Enriquez miburak og 18 puntos ug ingon man 16 puntos alang sa kadaugan sa MLS nga aduna na karo’y 2-1 nga baraha.

Ang 36 puntos nga gipabuto ni Gladys Mantilla wala makatabang sa ilang kampanya tungod kay wala man kahuygo og maayo ang iyang ubang mga teammates.

Kanunay nagdumala sa torneyo ang presidente sa LAYA nga si Robbie Ylanan ug ingon man nagtan-aw sa duwa ang mga advisers nga sila si police Supt. George Ylanan ug Mark Ylanan.

Puntos kada usa:

First Game:

CIIB (73)— Bugtai 20, Veloso 19, Andong 7, Plasus 6, Maglinte 6, Maucesa 4, Efe 3, Ylanan 2, Conderos 2, Mendaros 2, Aldemita 2

Gold (71)— Rollon 13, Antiporda 13, Along 12, Trinidad 8, Rosero 7, Hisoler 6, Rosales 6, Baculi 2, Ursal 2, Solon 2

Second Game:

MLS (71)— Luague 16, Enriquez 16, Ylanan 12, Siaotong 11, Parba 5, M. Siaotong 4, Banglos 4, Gomez 2, Montebon 1

Yellow (69)— Mantilla 36, Campanilla 12, Dela Cerna 7, Herenia 5, Camacho 5, Cardosa 4, Quesola 2, Monada 2. - Gabby G. Malagar (BANAT NEWS)