Spurs daug human sa 2 OT

CEBU - Gipaningot una’g bugbog ang San Antonio Spurs sa wala pa sila makaginhawa’g lawom tungod kay nag-agi una og duha ka overtime sa wala pa nila hingpit pabugnawa ang host Dallas Mavericks pinaagi sa pag-iskor og 133-126 nga kadaugan kagahapon sa nagpadayong aksiyon sa 2008-2009 season sa National Basketball Association (NBA) didto sa American Airlines Center sa Dallas, Texas. Tungod sa pagkumboya nilang Tim Duncan, Tony Parker ug Manu Ginobili, mibalik na sab ang kabangis sa Spurs nga naka-angkon na karon og 12-8 nga baraha.

Usa ka krusyal nga three-pointer gikan sa ilang defensive specialist nga si Bruce Bowen maoy daku’g natabang alang sa maong makuyaw ug kulbahinam nga kadaugan sa Spurs.

Si Duncan mikamada og 32 puntos ug gisundan siya ni Parker nga may 29 puntos ug 18 puntos kang Ginobili ug lain pa gyung 13 puntos gikan nila ni Michael Finley ug Matt Bonner.

Naglabaw pa unta og tres puntos ang Spurs, 104-107 apan nakapasulod si Dirk Nowitzki og triple aron tablahon ang iskor sa 107-all may 1:23 pa ang nahibiling oras sa regulation ug sukad niadto, napupos ang oras nga wala na maka-iskor ang duha ka teams aron paghatod sa duwa ngadto sa first overtime.

Sa second overtime, wala gihapon makabadbad sa gapos ang Spurs ug samtang naglabaw sila’g 116-113 sa kataposang 43 segundos, nakapasulod sab si Jason Kidd sa Mavericks og triple aron tablahon na usab ang iskor, 116-all hinungdan sa second overtime.

Atol sa double overtime, ang Spurs ug ang Mavericks nakasinati ug unom ka lead changes ug tulo ka tabla una pa nagmadaugon ang Spurs kinsa usa lang sa tulo ka nanulong nga midaug kagahapon sulod sa siyam ka duwa palibot sa NBA.

Si Nowitzki maoy nangu sa Mavericks sa iyang 35 puntos ug 10 ka rebounds samtang si Kidd may 29 puntos, walo ka rebounds ug 12 ka assists. Parehong may 19 puntos sila si Jason Terry ug Jose Juan Barea alang sa Mavericks.

Ang laing misulong nga team nga midaug kagahapon mao ang Orlando Magic kinsa mipatapsing sa Portland Trailblazers aron hatagan sa ilang unang home loss sa iskor, 109-108 pinaagi sa three-pointer ni Hedo Turkoglu sa may three-tenths sa segundos didto sa Rose Garden sa Portland, Oregon.

“I just dribbled hard and jumped. The shot went in,” matod pa ni Turkoglu kinsa mihakot og 24 puntos alang sa Magic.

Laing midaug sa ilang road game mao nag Utah Jazz kinsa mipukan sa Minnesota Timberwolves, 99-96.

Usa sa labing upset kagahapon mao ang kadaugan sa Sacramento Kings batok sa ilang silingan nga Los Angeles Lakers sa iskor, 113-101.

Sa laing mga duwa, gikulata sa Cleveland Cavaliers ang Toronto Raptors, 114-94, naka-upset ang Washington Wizards batok sa Detroit Pistons, 107-104, midaug ang Chicago Bulls batok sa New York Knicks, 105-100, gibalian og pako sa Houston Rockets ang Atlanta Hawks, 92-84, ug gipasoan sa Phoenix Suns ang Milwaukee Bucks, 125-110. - Gabby G. Malagar (BANAT NEWS)