SHS-J, USC-N misakmit tagsa-tagsa ka titulo

CEBU - Ang University of San Carlos-North Campus nagsalig sa pagkamabayanihon nilang John Michael Pajantoy ug Tikoy Gacrama aron pagposte og 44-41 nga kadaugan batok sa Sacred Heart School-Jesuits (SHS-J) Eagles aron paglangkat sa korona sa midget division sa Primovit-backed Futures Basketball League (FBL) didto sa Capitol Parish gym sa dalan Escario, ning siyudad.Apan kun unsa kakulbahinam ang sangka sa midget, nahilabwan kini sa engkwentro sa mini division dihang midaog ang SHS-J Blue Eagles batok sa Don Bosco Technology Center sa iskor nga 58-50 apan nag-agi una og duha ka overtime.

Ang DBTC may duha ka higayon nga modaog sa korona, apan tungod sa ilang haw-ang kaayong depensa, nakahigayon ang Sacred Heart paghatod sa duwa ngadto sa overtime human magtabla ang iskor, 40-all.

Sa overtime period, ang DBTC naglabaw og dos puntos, 50-48 sa nahabiling 16 segundos, apan si Jed Colonia mipasud sa iyang tirada katapusang singko segundos aron paghatod sa duwa ngadto sa ikaduhang overtime.

Gipahugtan sa Blue Eagles ang ilang depensa sa ikaduhang overtime ug sa kalit lang milabaw na sila’g otso puntos, 58-50 ug gikan niadto wala na makarekober ang DBTC. 

Human sa duwa, si coach Mike Reyes maoy nangunay og tunol sa mga tropeyo ngadto sa outstanding individual achievers.

Ang mga awardees sa mini division mao sila si Benedict Chua Jr. ug Jed Colonia sa SHS-J ug Scott Aying sa DBTC. Ang Rising Star napunta ngadto ni Angelo Gabriel Pioquito sa SHS-J.

Ang awardees sa midget division mao sila si Arne Padilla sa USC ug Jarell Mercado ug Reggie Abbu sa SHS-J. Si Pajantoy sa USC-North maoy nakakuha sa Rising Star award.

Puntos Matag Usa

Unang duwa (Mini Division)

Sacred Heart (58) - Pioquinto 20, Araw-araw 15, Mendoza 8, A, Chua 7, Colonia 4, Sepulveda 2, Dumol 2

DBTC (50) - Aying 27, Quimque 7, Villagracia 6, Del Campo 4, Jumao-as 3, Hapin 2, Tabasa 2

Ikaduhang duwa (Midget Division)

USC-North (44) - Pajantoy 12, Gacrama 10, Alipio 4, Armenion 4, Aliser 3, Arnejo 3, Piad 2, Pleños 2, Bulan 2

SHS-J (41) - Sing 8, Huang 6, Go 6, Saceda 5, Wahing 5, Abbu 4, Navarro 3, A. Lim 3, Mercado 1. (BANAT NEWS)