Slaughter dili kauban sa CESAFI Selection

CEBU - Ang star center sa University of the Visayas (UV) nga si Greg Slaughter dili maka-uban sa CESAFI All-Star squad nga mobanat sa 17th Kung Sheung International Basketball Invitational Championships didto sa Hong Kong sunod semana   kay morepresentar man siya sa nasudnong koponan nga gitukod sa Samahang Basketbol ng Pilipinas (SBP) sa laing torneyo didto sa China.

Usa si Slaughter nga gipili aron maglangkob sa CESAFI Selection alang sa Hong Kong tournament karong Disyembre 16-21, apan ang UV management mapahiubsanon nga mikuha ni Slaughter sa team human sila makadawat og imbitasyon sa mga kadagkuan sa SBP aron paduwaon ang 6-foot-11 sa Asean-CBO Men’s Basketball Invitational karong Disiyembre 17-21 didto sa Pingguo, Guanxi, China.

"I got a call from SBP executive director Noli Eala requesting me, in behalf of SBP president Manny Pangilinan, if Slaughter could play for the national team," matud pa ni Cebu First District Rep. ug UV president Eduardo 'Eddiegul' R. Gullas. "Didi Gullas just gave the go signal for Slaughter to play in the China tournament," dugang pa niya diin iyang gipasabot ang iyang anak nga maoy team manager sa UV Green Lancers nga si Gerald Anthony 'Didi' S. Gullas.

Ang China event maoy labing unang international nga kompetisyon diin ang SBP mopadala sa national pool niini ubos ni Serbian coach Rajko Toroman.

Bisan og nakatando na sila sa CESAFI, si Gullas nagakanayon nga angayan nilang hatagan og tukmang importansiya ang pagduwa sa China gumikan kay ang national team mo-away man alang sa garbo ug dungog sa nasud.

Ang 19-anyos nga si Slaughter mipatik sa iyang pangan sa kasaysayan sa CESAFI human nahimo isip labing unang player nga miharos og daog sa regular season, All-Star ug Finals MVP awards ug ingon man sa 'Slam Dunk' title sud sa usa lamang ka season.

Si Slaughter mibanat sa labing unang higayon sa Philippine Collegiate Champions League (PCCL) sa maging semana, apan natagak sila sud lamang sa unang hugna human mapilde sa University of the East (UE) Red Warriors, 62-68.

Matud pa ni CESAFI commissioner Felix 'Boy' O. Tiukinhoy Jr. nga ang ihulip ni CESAFI Selection head coach Elmer Cabahug sa gibakantihang puwesto ni Slaughter mao si Fil-Australian rookie forward nga si John Emel Rowe sa University of San Carlos (USC) Warriors.

Gawas ni Slaughter, ang 6-foot-9 nga si Jun Mar Fajardo sa University of Cebu naapil sab sa SBP national team pool. Wala pa hinuoy opisyal nga kompirmasyon kun ipaslak ba sab siya sa SBP RP Team nga mobiyahe ngadto sa China. – BANAT NEWS