Eyeberry '86 nakabangon sa SCBHABA Atan Guardo Cup

CEBU - Alistong nakabangon ang Eyeberry '86 sa 2008 University of San Carlos Boys High Alumni Basketball Association (USCBHABA) Atan Guardo Barkadahan Cup didto sa USC-North Campus gym.

Ang Eyeberry nga gipangulohan ni Arturo Pepito 'Pitoy' Mata, kinsa miligwat og 31 puntos nilabaw og usa ka dosenang puntos sa unang 10 minutos sa duwa, 23-11 ug ilang gitak-op ang first half sa iskor nga 42-27. Apan ang Gemmary miusab sa tono sa duwa sa third quarter pinaagi sa pagpabuhagay sa ilang opensiba aron pagkitkit sa labaw ngadto na lang sa uno punto, 56-57 paghuman sa maong kuwarter.

Hinuon ang Eyeberry nakabawi sa katapusang kuwarter diin ilang gilupig sa scoring ang Gemmary 28-17 aron paglansang og 12 puntos nga kadaugan.

Ang Eyeberry maoy labing bag-ong produkto sa Uniherb Philippines, usa sa nag-unang health companies sa nasud nga tiggama sa nabantog nga food supplements sama sa Arthro, Kidneycare, Heartvit ug Diabet.

Sa laing aksiyon, si kanhi pro ug commercial star nga si Lou Regidor mipabuto og 33 puntos alang sa B-Meg '85, kinsa naka-eskapo gikan sa mga kamot sa GIO Electronic Motors bitbit ang 80-78 nga kadaugan.

Nakakuha sab og suporta si Regidor gikan nilang Virgil 'Bing' Pua ug Jone Sepe nga nagkumboya og 32 puntos.

Si Bonito Zanoria maoy nangulo sa GIO '88 sa iyang 22 puntos, gisundan ni Edmund Odullo nga miani og 16 puntos, samtang sila si John Andrew Auza ug Dindo Sausa nagkumboya og 25 puntos.

Puntos Matag Usa

Unang duwa:

Eyeberry (85) - Mata 31, Romarate 15, Congson 12, Amores 8, Monsanto 7, Matugas 3, Romero 4, Catubig 2

Gemmary (73) - Gacayan 21, Monterroyo 17, Merced 13, Rebolido 10, Medina 8, Gelbolingo 4

Ikaduhang duwa:

B-Meg (80) - Regidor 33, Pua 19, Sepe 13, Mercado 6, Bacaltos 5, Aznar 4

GIO (78) - Zanoria 22, Odulio 16, Auza 13, Sausa 12, Tajanlangit 6, Guardo 4, Pagapulaan 4, Saso 2. - Yoyo R. Abayan (BANAT NEWS)