Builders gi-bulldozer sa Niños

CEBU - Nagkumboya sa usa ka kalit nga rally ang kusgan nga si Ron Capati ug maabtik nga point guard nga si Woodrow Enriquez kinsa parehong mi-iskor og 14 puntos aron baswaton ang mas tag-as nga Liga Pilipinas inaugural champion M.Lhuillier Kwarta Padala-Cebu Niños pinaagi sa pag-iskor og 111-104 nga kadaugan batok sa host Carmer Copper Corporation-Construction Services Department (CCC-CSD) Builders atol sa ilang kulba-hinam nga exhibition match kaniadtong Biyernes didto sa CCC Sports Complex sa Lutopan dakbayan sa Toledo.

Ang three-pointer ni Enriquez maoy naghatag pagbalik sa abante sa Niños nga kanunay gyud naggukod gikan sa sinugdanan, 101-100 sa may 3:12 ang oras sa fourth period. Ang ilang mga krusyal nga tirada mao sa’y hinungdan nga kalit lang napapas ang 13 puntos nga labaw sa Builders sa second period, 32-45 pinaagi sa back-to-back nga undergoal basket ni Jerry Jaca kinsa kanhi sab usa ka beteranong commercial player.

Mitampo sab dayon si Capati og sagunson tulo ka puntos aron pag-inat sa labaw sa Niños ngadto sa upat ka puntos, 104-100. Sila si Capati ug Enriquez maoy mi-iskor sa kataposang siyam ka puntos alang sa Niños sa daginotong oras sa maong sangka ug dayon mi-iskor sab si Bruce Dacia alang sa 111-104 nga kadaugan.

Ang mas tag-as nga Niños wala na gani makahuna-huna og gamit ni Ariel Mepaña ug ang iyang kanhi kauban sa UV Lancers ang 6-8 nga higante nga si Rino Berame maoy nagmangtas sa undergoal ug mitampo kini’g 17 puntos apan si Stephen Padilla maoy nakahipos og labing daghan pinaagi sa iyang 18 puntos.

Ang lain pa gyung big man sa Niños nga si Marlon Basco igo lang mi-iskor og pito ka puntos apan ang iyang depensa ngadto sa laing higante nga si Jun Mar Fajardo, ang 6-8 nga sentro sa UC, maoy usa sa nakatabang sa ilang tinguha pagpukan sa Builders.

Si Fajardo nga nakahimo sab og daghang blockshots ngadto sa iyang mga kaatbang sa Niños, mi-iskor og 13 puntos alang sa Builders ni coach Boboy Cal nga gi-abangan sa ilang team consultant nga si Romy Cal.

Ang Builders nakamaneho ug 29-19 nga labaw pagkahuman sa first period dihang nakapasulod og buzzer-beating triple ang kanhi sakop sa RP Youth team nga si Wilbert Sayson kinsa nakatampo ug 11 puntos.

Si Jaca kinsa nakaduwa sab sa ML Jewelers, maoy nangu sa Builders sa iyang 24 puntos samtang si Aldrin Ocañada nga kanhi sab usa ka Jeweler, mibahug sab og 19 puntos ug si Roy Arnado may 10 puntos.

Ang Niños migamit og hugot nga depensa aron makarekober sa iyang dakung biya ug hinay-hinay silang nakasikit sa kadugayan aron taposon ang halftime sa iskor 50-56 pabor gihapon sa Builders.

Mibuhi og 8-0 run ang Niños pagsugod gyud sa fourth period ug ang kalit nga five-point swing ni Basco ug three-pointer ni Dacia maoy nakahatag kanila ug 58-56 nga abante.

Sa wala madugay, nagsugod daon ug sinukliay sa mga tirada ang duha ka teams hangtod nga nakuha sa Niños ang momentum. Kataposang nakalabaw ang Builders sa iskor, 100-98 sa undergoal basket ni Arnado.

Si Gerry Cavan maoy ika-limang player sa Niños nga nakahimo’g double figures sa iyang 12 puntos.

Wala mokuyog si coach Raul “Yayoy” Alcoseba didto sa Lutopan ug iyang gisalig ang iyang mga batus ngadto sa iyang mga coaching staff nga naglangkub nilang Tata Merced, Jay Ramirez ug Lou Regidor nga pulos mga kanhi PBA players.

Sa preliminary game, ang Security Division mibuntog sa PPD/ Machine Shop sa iskor , 102-93.

Puntos kada usa

Security (102)— Barcenas 21, Perras 16, Godornes 16, P. Sullano 14, Pardillo 8, Ocariza 6, Pepelot 5, Tuquib 5, E. Sullano 3, Leponira 3, Talisik 3, Lindo 2

PPD/Machine shop (93)—M. Pepito 36, Villarin 16, Obando 13, Ricafort 8, Carillo 6, Blanco 4, Paparate 4, Moniva 2, Diaz 2, Pepito 2

Second Game:

MLKP-Cebu Niños (111)— Padilla 18, Berame 17, Capati 14, Enriquez 14, Cavan 12, Dacia 9, Ababon 8, Aying 8, Basco 7, Tangkay 4

CCC-CSD (104)— Jaca 24, Ocañada 19, Fajardo 13, Sayson 11, Arnado 10, Delos Santos 8, Redulosa 8, Abatayo 5, Montalbo 4, Juliane 2 Halftime: 50-56. - Gabby G. Malagar (BANAT NEWS)