Warriors gilubong sa Green Archers

CEBU - Walay tihik-tihik nga depensa maoy gihimong hinagiban sa De La Salle University (DLSU) Green Archers paglubong sa University of San Carlos (USC) Warriors, 71-51 sa nagpadayong 2008 Philippine Collegiate Champions League (PCCL) Sweet 16 kagahapon didto sa The Arena sa San Juan.

Ang Green Archers, ang 2008 UAAP losing finalists mipatuman og full-court defense sa tibuok duwa nga naghatag og kalisud sa Warriors pagporma sa ilang halfcourt plays.

Igo lang milabaw og siyete puntos Green Archers, 17-10 paghuman sa first quarter ug ila pa nga napalawman ang lubong ngadto sa 16 puntos, 55-40 paghuman sa third quarter sa wala pa nila maangkon ang 20 puntos nga kadaugan.

Ang Green Archers nagtinguha moabante sa quarterfinals batok sa modaog sa duwa tali sa University of the East (UE) Red Warriors ug University of the Visayas (UV) Green Lancers nga magtige karong adlawa.

Ang La Salle maoy ikatulong seeded team nga nakaabot sa Final Eight sunod sa Ateneo ug San Beda, samtang ang USC maoy ikaduhang provincial team nga natagak sa maong torneyo sunod sa University of San Jose-Recoletos (USJ-R) Jaguars.

"We're lucky to be bracketed with San Carlos because I don't think we had a decent practice due to conflict of schedules. In our last practice, we only had seven players present," matud pa ni La Salle coach Franz Pumaren.

Nagkanayon si Pumaren nga sila si JV Casio, James Mangahas, Rico Maierhofer, Peejay Barua, P.J. Walsham ug Rejan Leen adunay mga commitments sa PBL ug dili siya makapugos kanila aron moapil sa praktis sa La Salle kun aduna sila'y duwa o practice uban sa ilang commercial teams.

Puntos Matag Usa

La Salle (71) - Casio 13, Bagatsing 11, Barua 11, Mangahas 8, Walsham 5, Maierhofer 5, Malabes 4, Webb 4, Mendoza 4, Ferdinand 3, Chandumal 3

San Carlos (51) - Hermosa 13, Rowe 9, Padillo 8, Joven 7, Codilla 4, Cortes 3, Cantonao 3, Bautista 3. – BANAT NEWS