Hatton daug apan Bautista pakyas

CEBU - Wala musalir ang gahum sa ‘Magic Man’ Paulie Malignaggi dihang gikulata siya ni Ricky ‘Hitman’ Hatton sa ilang away kagahapon alang sa IBO light-welterweight title didto sa MGM Grand Garden Arena sa Las Vegas City, Nevada.

Atol sa eleventh round, ang British Brawler mipahaguros og kinumo ngadto ni Malignaggi nga maoy nakapaaghat sa trainer niini nga si Tony McGrit nga molayat sa ring aron ihunong ang away.Sa nahibiling 28 segundos. Nagbagang gisugdan ni Hatton ang away batok ni Malignaggi ug nagpadayon kini ngadto sa eleventh round.

Ang trainer ni Hatton nga si Floyd Mayweather Sr. nagkanayon nga kontinto siya sa gipakitang away sa Briton nga mipakita sa iyang abilidad aron madepensahan ang iyang bakus. Tungod sa mga makusug nga sukmag nga nadawat ni Malignaggi, mihubag ang nawong niini maoy hinungdan sa pagkaluya niini sa sixth round ug nagpunay nalang kini og gakus ngadto ni Hatton.

Ang 30-anyos nga si Hatton mipasulod og 124 sa 516 sa iyang mga kinumo mas taas kung itandi sa 91 sa 342 ka mga kinumo nga gipadapat ni Malignaggi. Si Hatton usab ang nag-una sa scorecard sa duha ka mga hurado sa wala pa gihunong ang away.

Si Hatton nagkanayon nga mahinungdanun alang kaniya ang maong kadaugan aron makabangun siya sa katapusan niyang kapakyasan batok sa kanhi pound-for-pound king Floyd Mayweather Jr. niadtong Disyembre 8 sa miaging tuig.

Sa laing bahin, human sa ilang away ni Malignaggi, wala’y pagduha-duha nga gitawag ni Hatton ang pangalan sa pambansang kamao Manny ‘Pacman’ Pacquiao ug mipadayag nga interesado siya nga makigharung sa Pinoy boxing icon human unya sa away niini batok sa ‘Golden Boy’ Oscar De la Hoya karong umaabot nga Disyembre 6 didto gihapon sa Las Vegas.

Sa laing bahin gigamit sa Mehikanong si Heriberto ‘Cuate’ Ruiz (38-6-2, 22KOs) ang iyang pabor sa kasinatian aron mopatigbabaw batok sa ALA boxer nga si Rey ‘Boom Boom’ Bautista (26-2, 19KOs) pinaagi sa pag-iskor og usa ka unanimous decision sa undercard sa Hatton-Malignaggi bout kagahapon didto sa MGM Grand Garden Arena sa Las Vegas, Nevada.

Si Ruiz mao ang midominar sulod sa walo ka round sa ilang binakbakay, atol sa third round usa ka left hook ang gibuhian ni Ruiz ngadto ni Bautista nga miresulta sa pagkatumba niini.

Si Bautista nakasugat og daghang kakulian sa maong away lakip na niini ang dakong gisi sa tuong kilay niini tungod sa panagbangga sa ulo nila ni Ruiz sa second round. Usa usab ka point deduction ang gipahamtang ngadto ni Bautista tungod sa pag-lowblow niya sa Mehikano sa seventh round.

Human sa ilang away, tulo ka mga hurado ang mi-iskor og 77-73, 78-72 ug 80-70 tanan pabor ngadto ni Ruiz.

Usa sa mga nakitang kuwang ni Bautista mao ang pagkawagtang sa iyang jab nga mao unta ang mopugong sa atake sa Mehikano, samtang si Ruiz padayon sa iyang pagpahaguros og mga kinumo nga mipakita usab og nindot nga lateral movement nga maoy nakaluya sa nagkadugong si Bautista.

Mao kini ang ikaduhang kapildihan ni Bautista nga pulos niya natagamtaman didto sa Estados Unidos. – BANAT NEWS