Cebu Midnight Run gitakda sa Dec. 14

CEBU - Ang gipaabot nga 7th Cebu Midnight Run mosikad sa tungang gabii sa Disyembre 14 diha sa City Sports Club-Cebu sa Cebu Business Park.

Si race director Raffy Uytiepo nagkanayon nga tungod sa mga yangongo sa mga club members ug running enthusiasts, ilang gibanhaw ang lumba sa dagan human kini mapalta niadtong 2006 tungod sa ASEAN Summit nga gipahigayon dinhi sa Sugbu.

Malaumon si City Sports Club-Cebu sports manager Rey Fuentes nga daghan ang mosalmot ning tuiga, apan ila lang limitahan ang partisipante ngadto sa 400 pinaagi sa first-come-first served bases.

Pipila ka mga kahugpongan ang mipadayag sa ilang partisipasyon nga naglakip sa Cebu Executive Runners Club, Holiday Gym & Spa, Rox Gym, Utafa, Prycegas ug Atan Guardo Runners.

Mga tropeyo ug medalya ang maangkon sa top 10 finishers sa men ug women’s divisions.

Ang tanang mga entrante makadawat og singlets ug midnight snacks.

Ang 7th Cebu Midnight Run gipasiugdahan sa Arthro ug City Sports Club-Cebu. Gipaluyohan sab kini sa Cebu Holdings Inc., Athlete’s Foot, Waterfresh Drinking Water, Ben Cafe, Prycegas, Holiday Gym & Spa, Pfizer, Island Grill Express, New Datche Philippines, Sun Cellular, The Freeman, Banat News, Stocks R Us, Shellane, Manila Foodshoppe ug Casa Ilongga.

Ang registration gisugdan na diha sa PSC Region VII Office nga nahimutang sa Cebu City Sports Center ug sa City Sports Club. – BANAT NEWS