CEBU – Tak-opon na karong adlawa ang 2008 MS Motosuit Motocross pinaagi sa pagpahigayon sa 2nd City of Carcar Mayor’s Challenge didto sa Ramona’s Recreation and Multi-Purpose Center sa Carcar.
Si Glenn Aguilar maoy mangulo sa kapin sa 60 ka riders gikan sa Luzon, Visayas ug Mindanao nga nangandoy’ng mosakmit sa titulo karong adlawa sa 14th ug final leg sa labing dakung motocross series dinhi sa Sugbu.
Mga tang-an riders sama nilang Pepo Rubi, Irwin Ramas-Uypitching, Jon-Jon Adlawan ug Juvanni Abellar gipaabot nga mowadwad ning katapusang hugna sa lumba ning tuiga aron masakmit ang korona.
Angayan sab nga lantawon sa aksiyon karong adlawa mao si Seigfred Ornopia, kinsa maoy nag-unang kandidato alang sa “Rider of the Year.” Si Ornopia nidominar sa nangaging mga lumba sa executive class.
Ang 14th ug final leg gipaluyohan sab sa Imarflex Evvo Battery Manufacturing ug sa Castrol. – BANAT NEWS