CEBU – Gisugdan sa Sacred Heart School-Jesuit (SHS-J) Eagles ang ilang kampanya pinaagi sa pagbuntog sa Don Bosco Pampanga, 69-57 sa Passerelle division sa national finals sa MILO SBP-Passerelle Twin Basketball tournament didto sa University of San Agustin Gym sa Iloilo City.
Ang SHS-J milabaw og otso puntos paghuman sa unang 10 minutos sa duwa, 26-18, apan ang Luzon leg champion Don Bosco mibawos sa sunod nga hugna ug napahakan ang labaw ngadto na lang sa dos puntos, 34-36. Nakontrolar sa Don Bosco ang ilang momentum ug nakatabla pa kini, 38-all sa sayong bahin sa third quarter sa wala pa kontrolaha sa SHS-J ang duwa sa third, 52-44. Misaka pa ang labaw sa Eagles ngadto sa 61-49 sa nahabiling 2:48 sa duwa.
Ang Don Bosco milusad og laing rally aron paglaslas sa labaw, 61-56 sa katapusang 1:26, apan ang SHS-J mibawos pinaagi sa pagpasud sa ilang walo ka free kortesiya nilang Jerry Seno, Daryl Nazareno ug Gabe Branzuela aron pagseguro sa ilang kadaugan.
Si Nazareno maoy nangulo sa SHS-J pinaagi sa iyang 17 puntos.
Sa pagsuwat niini, ang Eagles naniksik pa alang sa ilang ikaduhang sunod-sunod nga daog batok sa Mindanao regional champion Sacred Heart of Jesus Montessori sa Cagayan de Oro.
Sa laing duwa, ang Visayas SBP champion Bacolod Tay Tung High School milansang og 2-0 pagsugod sa Visayas region dihang ilang gipahamtangan og 67-41 nga kapildihan ang Luzon champion International School for Better Beginnings sa Lucena.
Sa lain pang duwa sa Passerelle, ang pre-tournament favorite La Salle Greenhills sa National Capital Region (NCR) milubong sab sa Mindanao champion Sacred Heart of Jesus Montessori sa Cagayan de Oro, 108-76. Samtang ang defending champion Ateneo de Manila mikulit og daog batok sa Ateneo de Davao, 41-32 sa SBP action. – BANAT NEWS