CEBU - Pormal na nga buksan karong adlawa ang Bago Invitational Basketball Tournament 2008 didto sa Bago covered court sa barangay Bago sa Asturias, Cebu.
Lima ka teams ang magtigiay alang sa dungog ug kini mao ang Grego Gro Fertilizers Tuburan-Cebu ni Vice Governor Greg Sanchez Jr. ug Paulina Pontillas, Tabuelan Selection ni Mayor Casiano Gerona ug Councilor Arlie Perez, Asturias Police ni chief of police Gerard Ace Pelare, Tubigan All-Star sa managsuong Renato ug Reynaldo de Motor ug ang Nangka-Balamban nga gipaluyohan sa barangay officials sa Nangka-Balamban.
Usa ka yanong opening ceremonies ang pagahimuon sa dili pa sugdan ang duwa nga gikatakda sa alas-8 sa gabii.
Ang tinamod ug tinahod nga barangay captain sa Bago nga si Hon. Urbanito Noel maoy pinasidunggang dinapit ug gipaabot nga mopaambit sa iyang mahinungdanong mensahe ngadto sa mga atleta gikan sa mga partisipanteng koponan. Si Vice Mayor Joel D. Dumdum maoy mopahigayon sa ceremonial ball pagtimaan sa pagsugod sa duwa.
Gipaabot sab nga motambong ang mga barangay officials sa Bago ug sa mga kasikbit nga kabarangayan.
Human sa programa, mosunod gilayon ang duwa diin ang Asturias Police makigsangka batok sa Tabuelan Selection, samtang ang mag-abot sa main game mao ang Tubigagmanok batok sa Grego Gro Fertilizers (Tuburan) nga gikatakda sa alas-9:30 sa gabii.
Ang maong torneyo naumol pinaagi sa paningkamot ni Dennis A. Montebon, kinsa maoy tournament chairman uban sa suporta sa iyang kapikas nga si Bago barangay councilor Carmel M. Montebon, ang chairman sa Committee on Sports. – BANAT NEWS