CEBU - Dali nga nakarekober ang Heartvit ‘93 human mamugnaw sa unang kuwarter aron pagpuhal sa Yayoy’s Grill and Resto Bar/Batch 2002, 65-59 sa nagpadayong aksiyon sa 2008 University of San Carlos Boys High Alumni Basketball Association (USCBHABA) Atan Guardo Barkadahan Cup didto sa USC-North Campus gym.
Ang Heartvit ‘93 ni team manager ug barangay Tisa no. 1 councilor Jeson L. Guardo biya og tres puntos, 12-15 paghuman sa unang 10 minutos sa duwa, apan nakabawi kini sa ikaduhang kuwarter aron pag-ilog sa labaw sa halftime, 29-25.
Nakontrolar sa Heartvit ‘93 ang tres puntos nga labaw paghuman sa third quarter, 43-40 ug mainiton kining nakigtigi hangtod na sa pagkapupos sa oras sa duwa aron pagkutlo og sayes puntos nga kadaugan.
Ang 2008 USCBHABA season gipasiugdahan sa Uniherb Philippines ni Atan Guardo nga usa sa nag-unang health companies sa nasud nga tiggama sa nabaniog na kaayong food supplements sama sa Arthro, Heartvit, Kidneycare ug Diabet.
Puntos Matag Usa
HEARTVIT ‘93 - Jumao-as 20, Colinares 18, Regidor 13, Bacolod 6, Nuñez 4, Kiamco 4
YAYOY’S GRILL (59) - Abellanosa 18, Ynclino 11, Move 10, Ruzi 7, Alcoseba 5, Piza 4, Ferrer 2 Tan 2. – BANAT NEWS