USJ-R sud finals sa CESAFI football event

CEBU - Gipahamtangan na sab og laing kapildihan sa University of San Jose-Recoletos (USJ-R) ang karibal niining University of San Carlos (USC), 1-0 sa Cebu Schools Athletic Foundation, Inc. (CESAFI) football event kagahapon didto sa USC Technology Football field.

Si Adrianne Mejaran maoy nakahimo pag-iskor sa tunga-tungang bahin sa second half nga naghatag og kahigayonan sa USJ-R pagdepensa sa ilang korona batok sa modaog sa duwa tali sa University of Southern Philippine Foundation (USPF) ug sa University of the Visayas (UV).

Sa miaging semana, ang USJ-R nakasugat sab og makutas nga duwa batok sa University of Cebu hinuon ilang naangkon ang kadaugan nga naghatag kanila og luna sa semifinal.

Ang 2004 champion USC moduwa alang sa ikatulong dapit batok sa mapilde sa laing semifinal match tali sa USPF ug UV. – BANAT NEWS