Bakbakan na sa URCC Cebu

CEBU - Kulbahinam nga aksiyon ang mahitabo sa dihang ang labing dakung kalihukan sa Mixed Martial Arts (MMA) sa nasud nga ulohan og “Universal Reality Combat Championship (URCC) Cebu III: Nemesis” ipahigayon karong alas-7 sa gabii diha sa Cebu International Convention Center (CICC) sa reclamation area sa dakbayan sa Mandaue.

Napulo’g-unom ka mga gikaintapang MMA fighters ang mopakita sa ilang abilidad diin ang walay pildeng Sugbuanon nga si Cary ‘The Prince’ Bullos makigpinaksitay ni kanhi bantamweight champion Lino ‘The Terminator’ Tagacay.

Si Bullos (11-0, 9KOs) maninguha nga modaog batok ni Tagacay (6-3,6 KOs) nga sakop sa Philippine Army aron matuman ang iyang pangandoy nga maka-away og world title gawas sa nasud.

Sa iyang katapusang away sa URCC XII didto sa kaulohan, si Bullos nidaog pinaagi sa pagpaundang sa mas tang-an nga si Arnel Arancina.

Sa iyang bahin, si Tagacay dili sab angayang kompiyansahan kay aduna kini igong abilidad, mga teknik ug labaw sa tanan anaa kini sa hustong kondisyon.

Si Bullos miaway ni Justin Cruz sa URCC XII, apan napilde kini pinaagi sa knee-bar submission. 

Gumikan niini, ang 32-anyos nga si Tagacay misaad nga iyang dag-on ang duwa ug ilogon og balik ang nahanaw niyang korona. 

"This is a more important fight for Lino (Tagacay) and it is a career-decider for him. This match will have a lot of pressure for Lino than for Cary," matud pa ni URCC Manila coordinator Franz Von Muhlfeld atol sa press conference kagahapon didto sa Loft Restaurant and Lounge-IT Park sa Barangay Apas, ning siyudad.

Sa supporting bouts, ang mopakita’g aksiyon mao sila si    Anthony Okdan sa Elements Gym vs. Engie Piloto sa Yaw Yan Ardigma Cebu, Victor Torre sa Bacolod vs. Demerio dela Torre sa Cebu C-Mac, Jet Lumawag sa Bacolod Fight Club batok Maxlito Yong sa Yaw-Yan Cebu ArDigma.Laing Bacolod fighter nga si Narlax de Cafe makigsangka ni Alvin Amistoso, Jan Selaryo batok   Leo Gaelaran, Alan Orong batok   Jimmy Yabo ug Joselito Loregas batok ni Geronimo Efac.

Ang mga tiket nagkantidad og P1,000 for VIP seats, P500 for lower box ug P200 for general admission. Alang sa ticket inquiries ug deliveries, tawag o text ni Judith sa 0917-628-4114 or log on sa www.jeugenioconcepts.com. Ang mga tiket mapalit sa Loft Restaurant and Lounge (238-0532).

Ang maong event gipresentar sa Colt 45 sa abag sa Loft Restaurant & Lounge ug CJRS MMA & Fitness Center. Gipaluyohan sab kini sa Samba Brazilian Corned Beef, Omega Pain Killer, Casino Ethyl Alcohol, Chris Sports, Bulls, Windy, Rich Media Network, J. Eugenio Concepts – Manpower Service Provider Group, Ecila, WESMA Jewelry and Watches, My Joy, Da Vinci’s Pizza, Cherry Cars, Mango Park Hotel, Tambuli Beach Resort ug Twin Bee Graphics. – BANAT NEWS