Yellow Dragons naka-ikyas sa third overtime

CEBU - Misangpot gyud ngadto sa tulo ka overtimes sa wala pa maugom sa Yellow Dragons ang 104-93 nga kadaugan batok sa Green Archers sa second conference sa 2008 Cebu United Bankers Association (CUBA) Basketball League didto sa Our Lady of Sacred Heart Parish sa Escario Street, ning siyudad.Si Emem Malahay, kinsa mibugwak og 17 puntos, kalmado kaayo mipasulod sa iyang mahinungdanon free throws aron pagtabla sa iskor, 63-all sa nahabiling tres segundos sa duwa nga naghatod sa duwa ngadto sa unang overtime.

Sayo unta nga maangkon sa Dragons ang kadaugan, apan si Alex Macaling pakyas sa iyang three-point play hinungdan nga nagtabla na sab ang iskor, 72-all alang sa ikaduhang overtime.

Ang Dragons nag-ambo na unta sa kadaugan dihang nilabaw og dos puntos, 80-78 sa katapusang singko segundos, apan si Ronron Yap, ang manghod ni PBA star Roger Yap, mibuhi sa iyang marka bahala nga itsa ug nasulod kini dungan ang pagserbato sa buzzer nga naghatod sa ikatulong overtime.

Sa ikatulong overtime, ang Dragons ni coach Edmond Tecson wala mopakita'g kaluya ug maisugon kining nakigkumbati hangtod nga ila gyud napukan sa hingpit ang Archers. 

Si Baco maoy nangulo sa Dragons sa iyang 21 puntos, gisundan ni Alex Macaling sa iyang 19 puntos. Si Robert Rafson Chua mitampo og 15 puntos alang sa Dragons nga nagtangag og 2-3 win-loss record.

Ang pilderong Archers gipangulohan ni Yap, kinsa mibahog og 25 puntos.

Sa laing duwa, si Eric So mipabuto og 19 puntos ug ang team captain nga si Volter Rosal midugang og 16 puntos alang sa Red Lions kinsa mibuntog sa Blue Eagles sa iskor nga 59-56.

PUNTOS MATAG USA

Unang duwa:

Dragons (104) - Baco 21, Macanig 19, Malahay 17, Chua 15, Allera 12, Cenita 10, Aparri 8, Navarro 2

Archers (93) - Yap 25, Saliz 20, Maravilla 12, Go 10, Liston 8, Lim 6, Ornopia 5, Matarlo 4, Cataros 3

Ikaduhang duwa:

Lions (59) - So 19, Rosal 16, Bacalla 8, Olalo 8, Jovs 6, Tevez 2,

Eagles (56) - Osorio 21, Gaballes 14, Rizada 8, Bargamento 7, Miñoza 4, Mirafuentes 2 (BANAT NEWS)