CEBU - Gilat-an sa University of Cebu (UC) Webmasters ang kaatbang niining AMA Computer College-Ormoc, 101-60 samtang ang University of San Jose-Recoletos (USJ-R) Jaguars mipukan sa Bacolod-based West Negros University (WNU) Mustangs, 88-77 sa Ormoc leg sa Philippine Collegiate Champions League (PCCL) Zonal eliminations didto sa Ormoc Super Dome.
Si Kim Arvin Gomez, anak ni Webmasters coach Roel Gomez grabe kaayong nakapakita og duwa ug mipabuto kini og 22 puntos, lakip na ang iyang lima ka three-point shots aron pangulohan ang Webmasters.
Laing lima ka kaubanan ni Gomez ang mirehistro sab og double figures alang sa ilang balanseng opensiba.
Si Lawrence Agas mitapos og 14 puntos, samtang si Rommel Luceño midugang og 12 puntos. Sila si Kevin Quilantang ug Janssen Abella adunay 11 puntos matag usa, samtang si Ralph Ramos miamot og 10 puntos.
Bisan pa og ilang gilubong ang AMA-Ormoc, dili pa angayan magsaulog ang Webmasters kay kinahanglan pa sila nga modaog batok sa pambato sa NCAA nga Letran Knights aron mabuhi ang tinguha paglangkat og luna alang sa Manila.
Nakabentaha'g gamay ang Jaguars tungod kay huyang man ang ilang makontra sunod nga mao ang Bohol Institute of Technology (BIT) Cruisers.
PUNTOS MATAG USA
UC (101) -- Gomez 22, Agas 13, Luceño 12, Quilantang 11, Abella 11, Ramos 10, Fajardo 7, Alviva 5, Mohamad 3, Cueva 3, Babad 2
AMA (60) -- Holohoyoy 13, Elejarde 10, Tayo 6, Barrientos 5, Rosal 5, Moldez 5, Bacho 4 (BANAT NEWS)