Donaire gimaymayan ni Guardo

CEBU – Gimaymayan ni Jonathan ‘Atan’ Guardo si IBF/IBO flyweight champion Nonito Donaire Jr. nga ipadaplin una ang iyang “rematch” ni Vic ‘The Raging Bull’ Darchinyan inay atimanon ang huhungihong sa posibleng mega-fight batok ni WBO champion Fernando Montiel o dili ba ni Interim WBA titlist Jorge Arce.

“I would like Donaire to face next either Montiel or Arce. I think they’re two great fighters who can give Junjun (Donaire) one hell of a fight. Forget about the Darchinyan rematch. Donaire has nothing else to prove against Darchinyan because he has already beaten him decisively,” matud pa ni Guardo.

Si Guardo, ang two-time “Sportsman of the Year” awardee sa Sportswriters Association of Cebu (SAC) maoy presidente sa Uniherb Philippines, usa sa nag-unang health companies sa nasud diin si Donaire nakabaton og six-fight contract isip official endorser sa Arthro.

“Even in the case of Manny Pacquiao, he did not yield to calls for an immediate rematch after he brutally destroyed Marco Antonio Barrera in 2003. Instead, he fought first the other marquee fighters in his division and that is a smart move I’d like Donaire to follow,” dugang pa ni Guardo, ang presidente sa Greater Cebu Sports Organizing Committee (GCSOC) -- usa ka pribadong organisasyon nga aktibong nalambigit sa sports development dinhi sa Sugbu.

Human nahimong undisputed super flyweight champion sa kalibutan pinaagi sa ninth round stoppage ni Christian Mijares niadtong Domingo didto sa Home Depot Center sa Carson, California, si Darchinyan bokal kaayo mipadayag sa iyang tinguha alang sa return bout ni Donaire, gani nanganti pa nga iyang pildihon si Donaire sa tumang kasayon sama sa gihimo niya ngadto ni Mijares.

Sa samang paagi, si Donaire bag-o pa lang sab mihaw-as og daog pinaagi sa pagpaundang sud sa ikaunom ka round ni South African Moruti Mthalane aron hawiran ang iyang duha ka world titles didto sa Mandalay Bay Resort and Casino sa Las Vegas, Nevada.

Si Donaire milangkat sa iyang IBF/IBO 112-pound crowns pinaagi sa pagpalagpot sa kanhi way pildeng si Darchinyan pinaagi sa 8th round TKO niadtong Hulyo 7, 2007 didto sa Harbour Yard Arena sa Bridgeport, Connecticut.

Ang Donaire-Darchinyan II halayo sa tinuod kay ang promoter ni Darchinyan nga si Gary Shaw mismo mipadayag nga way kalauman nga mahitabo ang maong away. - Yoyo R. Abayan (BANAT NEWS)