60 ka teams misalmot sa UBL

CEBU – Labing menos 60 ka teams ang misalmot sa pagbukas kagahapon sa Umapad Basketball League (UBL) Inter-Sitio basketball tournament nga gisugdan og taas nga parada padulong ngadto sa Umapad open court, dakbayan sa Mandaue.

Ang pagsikad sa maong torneyo gisugdan sa parada gikan sa tiilan sa Mandaue-Mactan bridge sa habig sa Umapad diin taas kayo ang kutay sa mga teams nga gibahin sa tulo ka grupo nga mao ang midget, juniors ug seniors division.

Ang maong torneyo gimugna ni Umapad Barangay Captain Zaldy S. Lumapas diin nahimong pinasidunggan nga dinapit si kanhi Mayor Teddy Z. Ouano kinsa mihatag usab og usa ka mensahe atol sa opening ceremony. Ang Umapad magsaulog sa ilang pangilin unya sa Disyembre 8 ubos sa ilang patron nga Immaculate Concepcion.

Ang kanhi PBA player sa Cebu Institute of Technology (CIT) Wildcats nga si Gilbert Demape usa ka molupyo sa Umapad nga usa sab sa naka-aghat sa mga batan-on pagduwa og basketbol.

Nasakop sa seniors category ang 40-above division.

Ang uban nga teams wala mosalmot sa parada kagahapon sa alas 2 sa hapon tungod kay wala pa mahuman og tahi ang ilang uniporme.

Ang mga misalmot nga teams diin uban niini misalmot sab sa tulo ka categories mao ang mosunod; LPC, Lemon, Wisdom, IRP, Froilan, San Jose, San Roque, Sta. Cruz, Birhen sa Regla, All Star Central, Cardinals, Sacred Heart, Archers, Keymart, Spurs, Survivors, Punishers, Lemary, Milwaukee, Bambam, SVF, JDT, Alaiza ug Kalubihan.

Si Lumapas nagkanayon nga ilang humanon og sayo ang torneyo apan hunongon nila ang duwa kung mag-uwan tungod kay ang ilang korte wala pa may atup.

Iyang gipahinungod ang torneyo sa mga batan-on inay sa paggamit sa ginadiling drugas. - Gabby G. Malagar (BANAT NEWS)