Pilar duwa sa cross-over

CEBU - Ang defending Cluster 5 champion Pilar moduwa sa cross-over round sa 4th Governor Gwen Garcia Unity Volleyball Cup for Women didto sa Sogod karong adlawa.

Ang Pilar miabante sa sunod nga hugna human midiga og 3-0 nga baraha sa mga duwa sa Cluster 5.

Unang gipilde sa Pilar mao ang Tudela, 25-6, 25-5, gisunod ang Poro, 25-8, 25-22 ug dayon ang San Francisco, 25-17, 25-20.

Ang San Francisco nakasulod sab sa cross-over round human mirehistro og 2-1 nga baraha.

Gipukan sa San Francisco ang Poro, 25-17, 25-14 ug dayon ilang gipulbos ang Tudela, 25-12, 25-9.

Ang Sogod ug Catmon mag-ilog sa no. 1 spot sa Cluster-A. Ang modaog maoy makigbatok sa San Francisco, samtang ang mapilde moharong sa Pilar. – BANAT NEWS