CEBU - Bisan pa sa sanction fees nga gipahamtang, wala gihapon magpabalda si four-division world champion Manny 'Pacman' Pacquiao ug padayon gihapon ang walay puas nga training alang sa umaabot niini nga away batok ni Oscar 'Golden Boy' de la Hoya nga ulohan og “Dream Match” karong Disyembre 6 (petsa 7 dinhi sa Pilipinas) didto sa MGM Grand Hotel and Casino sa Las Vegas. Nevada.
Ang trainer niining si Freddie Roach padayon gihapon nga mipailawom ni Pacquiao sa training regimen aron mapalambo ang iyang kusog ug ingon man ang kapaspas. Si Pacquiao bag-o pa lang natapos sa iyang sparring sessions batok sa mga welterweight boxers, labing ulahi batok sa kanhi kampiyon sa Britanya nga si Amir Khan didto sa nabantog nga Wild Card gym ni Roach.
Matud pa ni Roach, nga aduna na silay sekretong teknik nga ilang gamiton batok sa six-division world champion nga si De la Hoya.
Usa sa mga gibansay-bansay karon sa Pinoy boxing superstar mao ang pagpasulod sa iyang mga kinumo sa lawas ni De la Hoya. – BANAT NEWS