CEBU - Padayonon karong adlawa ang aksiyon sa 4th Governor Gwen Garcia Unity Volleyball (GUV) Cup for Women pinaagi sa pagpahigayon sa Cluster 5-A action didto sa lungsod sa Sogod.
Lahi sa uban nga mga clusters uban ang sub-cluster action, ang Cluster 5 mosubay og cross-over format.
Ang Cluster 5-A gilangkuban sa lungsod sa Borbon, Catmon, Carmen ug host-Sogod.
Ang nag-unang duha ka koponan sa maong grupo moduwa ngadto sa Poro sa isla sa Camotes ugma alang sa cross-over.
Sa dili pa ang cross-over, upat ka teams gikan sa Camotes Island ang magsangka alang sa taas nga posisyon sa cluster 5-B.
Ang Cluster 5-B naglakip sa defending champion Pilar, Tudela, San Francisco ug Poro.
Sama sa unang upat ka clusters, ang top two teams ning maong cluster mo-abante ngadto sa final ug moduwa alang sa overall title sa municipalities. – BANAT NEWS