MBA Christmas League 2008 gitakda

CEBU - Ang Mabolo Basketball Association (MBA) mopahigayon og basketball tournament nga ulohan og "Mabolo Basketball Association Christmas Basketball League 2008" nga tentatibong buksan karong Nobiyembre 18 diha sa Wilfredo B. Cabalse Sports Complex sa   Mabolo.

Ang torneyo adunay upat ka kategoriya -- ang Open/Seniors-A, Open/Seniors-B, Juniors ug ang Midget. Ang Open Seniors-A bukas ug walay limit sa edad, ang Open/Seniors-B alang lamang niadtong mga magdudula nga nagpuyo sa Mabolo ug nag-edad og 35-anyos paubos, ang Juniors alang niadtong nag-edad og 21-anyos paubos, samtang ang Midget alang niadtong nagpangedaron og 16-anyos paubos.

Ang torneyo mosubay og single round robin format diin ang top 3 winners sa matag dibisyon makadawat og ganting salapi.

Makampiyon sa Open/Seniors-A mobulsa og P15,000, mopahiluna sa ikaduha makaangkon og P10,000 ug ang ikatulo makadawat og P8,000.

Ang top 3 performers sa Open/Seniors-B ug sa Juniors division parehong makadawat og P8,000, P5,000 ug P3,000 matag usa, samtang ang makampiyon sa Midget division makaangkon og P5,000, ang second placer makadawat og P3,000 ug ang third placer mobulsa og P1,000.

Adunay special awards ang itunol alang sa best muse ug best in uniform.

Ang deadline sa pagsumiter sa mga line-ups hangtod lamang ugmang adlawa, Nobiyembre 8.

Alang sa dugang mga detalye, bisitaha lang sila si Manny Ruiz, Macoy Sarvida ug Willy Sumayang diha sa Mabolo Barangay Hall.

Gitukod ang maong liga pinaagi sa paningkamot nilang Manny Ruiz (chairman), Macoy Sarvida (vice chairman), Willy Sumayang (secretary) ug sa mga ginsakopan nga sila si Ruel Pistolante, Atong Gogo, Edward Ligas, Edwin Yares, Efren Sanico ug Neil Madrid. Hugtanon sab kining gipaluyohan sa Mabolo Barangay Council ubos sa liderato ni Brgy. Capt. Reynaldo Ompoc. – BANAT NEWS