CEBU - Pakyas ang Sugbuanong boksidor nga si Marvin Tampus sa iyang away sa gawas dihang miyukbo kini ngadto ni South African Muvhuso Nedzanani sa ilang binukbukay niadtong miaging adlaw didto sa Wembley Arena sa Johannesburg, South Africa.
Ang kanhi South African junior flyweight, World Boxing Council (WBC) Intercontinental light flyweight ug World Boxing Foundation (WBF) junior flyweight champion nga si Nedzanani midaog pinaagi sa unanimous decision.
Tulo sa mga hurado mi-iskor og 98-92, 99-91,100-90 pabor ni Nedzanani.
Sa maong kadaugan, si Nedzanani nagbitbit og rekord nga 21-1-3,12KOs, samtang ang taga-Liloan nga si Tampus nagbitbit og 17-9-2, 12KOs.
Ang 24-anyos nga si Tampus nakasangka na og mga banggiitang boksidor sama nila ni Eric Barcelona, Chatchai Sasakul ug Eden Sosona hinungdan nga gihatagan siya'g higayon sa pakig-away sa beteranong si Nedzanani. – BANAT NEWS