CentCom shootfest gitakda

CEBU - Ang Comcentcom Cup gikatakda karong Nobiyembre 14-16 diha sa Central Command (CentCom) Firing Range sa Camp Lapulapu, barangay Apas, ning siyudad.

Pasiugdahan kini sa Central Command ubos sa liderato ni Lt. Gen. Pedro Ike I. Inserto ug sa Kamagong Gun Club Shooters Inc.

Ang maong kompetisyon giabagan sab sa International Practical Shooting Confederation (IPSC) ug sa Philippine Practical Shooting Association (PPSA) ug nahulog usab kini ubos sa level 2 match.

Aduna kini registration fee nga P1,200 matag shooter, apan ang mga entrante gikan sa Armed Forces of the Philippines (AFP), Philippine National Police (PNP) ug sa non-officiating RO mobayad lang og P600.

Ang entry fee alang sa 4-man team competition nagkantidad og P1,500.

Ang pinusilay sa Nobiyembre 14 alang lamang sa range officers, samtang ang uban nga mga entrante magtige sa petsa 15 ug 16. Ang kompetisyon sugdan sa alas-8 sa buntag.

Makadawat og ganti ang top 3 sa Open division, top 5 sa Standard Hi-Cap class, top 2 sa Standard Single Stack, top 5 sa Production division ug top 2 sa Junior class ug ingon man ang Revolver category.

Aduna say mga ganti alang sa top 3 sa production class alang sa military personnel ug single stack class alang sa PNP/law enforcers/AFP reservists single stack, hi-cap ug production categories.

Aduna say champion ug runner-up alang sa Star Awards category ug ang tulo ka dibisyon sa range officers -- single stack, hi-cap ug production.

Ang team champion makadawat sab og award.

Alang sa dugang pang mga kasayoran ug buot mosalmot sa maong kompetisyon, mahimong mokontak sa Kamagong Gun Club sa telepono 516-1790. (BANAT NEWS)