Donaire-Darchinyan "rematch"

CEBU - Mikiuyot karon ang kalibutan sa duha ka boksidor nga si IBF/IBO flyweight champion Nonito 'Filipino Flash' Donaire (20-1, 13KOs) ug sa bag-ong WBC/nga si WBA super flyweight champion Vic 'Raging Bull' Darchinyan (31-1-1, 25KOs) ug posibleng mag-abot og balik ang ilang dalan alang sa usa ka "rematch."

Kini milutaw human sa ilang tagsa-tagsa nga kadaugan niadtong Domingo.

Ang Pinoy boxing idol nga si Donaire mipaundang ni South African challenger   Moruti Mthalane sa sixth round sa ilang binukbukay didto sa Mandalay Bay Resort and Casino sa Las Vegas aron magpabiling hari sa iyang dibisyon.

Sa iyang bahin, ang Armenian knockout artist mipaundang usab sa kanhi Mexican champion Christian Mijares sa ninth round sa ilang sangka didto sa Home Depot Center sa Carson City, California aron langkaton ang WBC/WBA super flyweight belt.

Human sa iyang away batok ni Mijares, gihagit ni Darchinyan si Donaire alang sa usa ka rematch, nanganti usab siya nga iyang isunod ang Pinoy sa listahan sa iyang mga biktima.  

Buot sab ni Darchinyan nga mobawos ni Donaire, kinsa mipakamang kaniya   sa ikalimang hugna   atol sa ilang IBF/IBO title fight niadtong miaging Hulyo 7, 2007. 

Sa iyang bahin, si Donaire kinsa mosaka karon ngadto sa 115 pounds mipadayag nga andam siya nga modawat sa hagit ni Darchinyan, apan ang Top Rank Promotions ni Bob Arum nagkanayon nga aduna na sila'y gipilian nga sunod ikasangka ni Donaire, lakip sa mga gipilian mao ang mga super flyweights nga sila si Jorge Arce ug Fernando Montiel sa Mexico.    (BANAT NEWS)